काठमाडौं । रौतहटको गरुडा नगरपालिका–९ स्थित गम्हरिया श्रीपुर माध्यमिक विद्यालयका शिक्षक रविन्द्रप्रसाद साह एक छात्रालाई आपत्तिजनक सन्देश पठाएको आरोपमा पक्राउ परेका छन्। शिक्षकले एसईई परीक्षा पास गरेकी छात्रालाई ‘ह्याप्पी बर्थडे मेरी जान’ भन्दै म्यासेज पठाएको खुलासा भएपछि विवाद चर्किएको हो।
छात्राले उक्त म्यासेजबारे परिवारलाई जानकारी दिएपछि आक्रोशित आफन्तहरूले विद्यालय पुगेर तोडफोड तथा शिक्षकमाथि कुटपिट गरेका थिए। घटनापछि विद्यालय परिसर तनावग्रस्त बनेको छ। स्थिति नियन्त्रणमा लिन इलाका प्रहरी कार्यालय गरुडाबाट टोली खटिएको थियो। प्रहरीले अश्रुग्यास प्रयोग गर्दै भिडलाई तितरबितर बनाएको र शिक्षक साहलाई पक्राउ गरिएको जनाएको छ।
प्रहरी इन्स्पेक्टर ओमप्रकाश यादवका अनुसार, साहमाथि प्रारम्भिक अनुसन्धान अघि बढाइएको छ। घटनापछि विद्यालयमा पठनपाठन पूर्ण रूपमा बन्द भएको छ। विद्यार्थीका परिवार र स्थानीयवासीहरूले यस्तो व्यवहार गर्ने शिक्षकमाथि कडा कारबाहीको माग गरेका छन्। उनीहरूले विद्यालयलाई सुरक्षित शैक्षिक वातावरण बनाइदिन प्रशासनसँग आग्रह पनि गरेका छन्।
