काठमाडौं । सभामुख चुनाव सकिएपछि अब दलहरु राष्ट्रपति चुनावमा केन्द्रीत भएका छन् । एमाले अध्यक्ष केपी शर्मा ओलीले बिहिबारको संसद बैठक सकिएपछि एमालेले राष्ट्रपति उम्मेदवारी दिने र त्यसमै राष्ट्रिय सहमति गर्नुपर्ने बताए ।
अध्यक्ष ओलीले एमालेको उम्मेदवारलाई सबैले समर्थन गर्न आग्रह गर्नुको पछाडि भने प्रधानमन्त्री पुष्पकमल दाहालको रुची रहेको छ । प्रधानमन्त्री दाहालले राष्ट्रपतिमा सबै दललाई मिलाएर अघि जाने प्रस्ताव अघि सारेका छन् ।
माघ ३ गते बसेको सर्वदलीय बैठकमा प्रधानमन्त्री दाहालले यसबारे धारणा सार्वजनिक गरेका थिए । त्यसैलाई निरन्तरता दिने क्रममा उनले बिहिबार समेत धारणा राखे ।
संसद भवनबाट बाहिरिने क्रममा राष्ट्रपतिका बारेमा समझदारी बनाउने कोशिश गरिरहेको बताए । ‘राष्ट्रपतिको कुरा अझै समय बाँकी छ । हामी सत्ता साझेदार र मैले पनि कुनै एउटा समझदारी बनिदिएको हुन्थ्यो भन्ने कोशिस छ । हामी त्यो कोशिस जारी राख्छौं’, प्रधानमन्त्री प्रचण्डले भनेका छन् ।
प्रधानमन्त्री दाहालले यस्तो धारणा सार्वजनिक गरेको केही समयमै एमाले अध्यक्ष केपी शर्मा ओलीले भने प्रतिवाद गरे । यता ५ वर्षे कार्यकालमध्ये साढे २ वर्ष मात्रै सरकारको नेतृत्व प्रचण्डले गर्ने र सभामुख र राष्ट्रपति एमालेको हुँदा साढे २ वर्षपछि माओवादीले सबै गुमाउने भएकाले राष्ट्रपति एमालेलाई दिने पक्षमा माओवादी केन्द्र देखिएको छैन ।
यसकै प्रभाव कांग्रेसले राष्ट्रपति पाउने आशा वलियो बनेको देखिन्छ । त्यसकै झल्को बिहिबारको संसद बैठकमा कांग्रेस महामन्त्री विश्वप्रकाश शर्माले समेत दिएका छन् । एमालेले प्रधानमन्त्रीलाई पिंजडाभित्र राखेकाले त्यसबाट बाहिर निकाल्नका लागि सरकारलाई विश्वासको मत दिएको स्पष्ट पारेका छन् ।
महामन्त्री शर्माले भनेजस्तै अहिले सरकारको नेतृत्व प्रचण्डले गरेको भएपनि अधिकार भने एमाले अध्यक्ष केपी शर्मा ओलीले नै लिएका छन् । आफु सरकारको नेतृत्वमा हुँदा राजनीतिक संयन्त्र बनाउने प्रस्ताव ठाडै अस्वीकार गर्ने ओली अहिले भने सरकार सञ्चालनको संयन्त्रको संयोजकको जिम्मेवारीमा छन् ।
