काठमाडौं । अभिनेता अनमोल केसी अभिनीत चलचित्र ‘फर्की फर्की’ को टिमविरुद्ध काठमाडौं जिल्ला अदालतमा कानुनी कारबाहीको प्रक्रिया सुरु भएको छ। साहित्यकार नरेन्द्रबहादुर श्रेष्ठले आफ्नो व्यक्तिगत मोबाइल नम्बर अनुमति बिना प्रयोग गरिएको भन्दै अभिनेता केसीसहित निर्देशक, निर्माता र अन्य सरोकारवालालाई विपक्षी बनाएर मुद्दा दायर गरेका हुन्।
श्रेष्ठले फिल्ममार्फत सार्वजनिक रूपमा आफ्नो फोन नम्बर प्रयोग गरिँदा आफू मानसिक र शारीरिक रूपमा प्रताडित भएको दाबी गरेका छन्। उनका अनुसार, फिल्म सार्वजनिक भएपछि अनगिन्ती अपरिचित फोन कल र सन्देशले उनको व्यक्तिगत गोपनीयता गम्भीर रूपमा प्रभावित भएको हो। श्रेष्ठले ओटीटी प्लेटफर्म एमएसएमलाई पटक–पटक आफ्नो फोन नम्बर हटाउन आग्रह गरे पनि कुनै सुनुवाइ नभएपछि कानुनी बाटो रोज्नुपरेको बताएका छन्।
दायर रिटमा उनी भन्छन् ः व्यक्तिगत नम्बरको दुरुपयोगले मलाई मानसिक सन्तुलन बिगार्ने खालको असर गरेको छ। कानुन उल्लंघन गर्नेहरूलाई कानुनी दायरामा ल्याउन म बाध्य भएको हुँ। श्रेष्ठले दायर गरेको रिटमा अभिनेता अनमोल केसीसँगै निर्देशक सुयोग गुरुङ, निर्माता रोहित अधिकारी, चलचित्र जाँच समिति तथा अन्य सरोकार निकायसमेतलाई विपक्षी बनाइएको छ। उनीहरूलाई सार्वजनिक सम्पत्तिमा हस्तक्षेप र मानसिक पीडामा योगदान पुर्याएको अभियोगमा कानुनी कारबाहीको माग गरिएको छ।
श्रेष्ठले चलचित्र जाँच समिति लगायत नियामक निकायहरूलाई पटक–पटक जानकारी गराए पनि कुनै प्रतिक्रिया नआएको उल्लेख गर्दै नियामक भूमिकामाथि पनि प्रश्न उठाएका छन्। सूचना अधिकारी दीपककुमार श्रेष्ठका अनुसार, मुद्दा दर्ता भइसकेको छ र प्रारम्भिक अध्ययनका लागि प्रक्रिया अगाडि बढाइएको छ।
फिल्मजस्तो सार्वजनिक सामग्रीमा अनुमति बिना व्यक्तिगत विवरण प्रयोग हुनु गम्भीर विषय हो। यस घटनाले नेपाली मनोरञ्जन उद्योगमा गोपनीयता, उत्तरदायित्व र नियमनको सन्तुलन कत्तिको संवेदनशील रूपमा लिइन्छ भन्ने बहसलाई पुनः तातो बनाएको छ।
