पोखरा, ४ माघ । स्याङ्जाको आँधीखोला गाउँपालिका वडा नं २ को नवनिर्मित वडा कार्यालय भवन बुधबार उद्घाटन गरिएको छ । गण्डकी प्रदेश सभा सदस्य सुधीर पौडेलले चिलाउनेबास निर्मित उक्त वडा कार्यालय भवनको उद्घाटन गरेका हुन् । एक करोड ८८ लाख रुपैयाँको लागतमा निर्मित उक्त पक्की भवनमा पाँच वटा कोठासहित एउटा सभाहल रहेको छ ।
२०७८ साल साउन ४ गते सम्झौता भई २०७९ को कात्तिक महिनामा उक्त भवन सम्पन्न भएको हो । भवन उद्घाटन पछि आफ्ना भनाई राख्दै प्रदेश सभा सदस्य पौडेलले व्यवस्थित संरचनाबाट वडावासीलाई गुणस्तरीय र प्रविधि मैत्री सेवा दिनु आजको आवश्यकता भएको बताए ।
आँधीखोला गाउँपालिका अध्यक्ष विश्वनाथ पौडेलले हालसम्म शिक्षा, स्वास्थ्य, पूर्वाधार विकास, खानेपानी, कृषि, पर्यटन, श्रम तथा रोजगार, लगायतका अन्य क्षेत्रहरूमा गरिएका मुख्य मुख्य उपलब्धिका बारेमा जानकारी दिएका थिए ।
