काठमाडौं।नेपाली कांग्रेसले पार्टीका वरिष्ठ नेता, पूर्व मन्त्री तथा समाजवादी चिन्तक ढुण्डिराज शास्त्रीको निधनप्रति गहिरो दुःख व्यक्त गर्दै शोक प्रस्ताव पारित गरेको छ। कांग्रेस केन्द्रीय कार्यसमितिको आकस्मिक बैठकले शास्त्रीप्रति श्रद्धाञ्जली अर्पण गर्दै तीन दिने शोक कार्यक्रम तय गरेको हो।
कांग्रेसका मुख्य सचिव कृष्णप्रसाद पौडेलका अनुसार असार ४, ५ र ६ गते तीन दिन पार्टीको सबै कार्यालयमा झण्डा आधा झुकाइनेछ। असार ५ गते बिहीबार पार्टीका केन्द्र, प्रदेश र जिल्लास्तरीय कार्यालय बन्द गरिनेछ। साथै, स्वर्गारोहणको १३ दिनसम्म कार्यालयहरूमा शोक पुस्तिका राखिने र १३औं दिनमा शास्त्रीको गृह जिल्ला अर्घाखाँचीमा शोकसभा गरिनेछ।
शास्त्रीको असार २ गते काठमाडौं मेडिकल कलेजमा ८९ वर्षको उमेरमा निधन भएको थियो। वि.सं. १९९३ जेठ २५ गते अर्घाखाँचीको किमडाँडामा जन्मिएका शास्त्री वि.सं. २०४८ र २०५१ सालमा प्रतिनिधिसभा सदस्यमा निर्वाचित भएका थिए। विद्यार्थी जीवनदेखि नै कांग्रेस राजनीतिमा सक्रिय रहँदै आएका उनी जननायक बीपी कोइरालाका अनुयायी, समाजवादी चिन्तक र प्रजातान्त्रिक समाजवादका व्याख्याता समेत थिए।
बैठकले शास्त्रीको योगदान नेपाली कांग्रेसको इतिहासमा सदा स्मरणीय रहने जनाएको छ। शोक प्रस्तावमार्फत कांग्रेसले उनलाई एक बौद्धिक, अग्रज र अनुभवी राजनीतिज्ञका रूपमा उल्लेख गर्दै आत्माको चिर शान्तिको कामना र परिवारजनप्रति समवेदना प्रकट गरेको छ।
