गण्डकी।कास्कीको पोखरा महानगरपालिकाले ‘घरघरमा स्वास्थ्य कार्यक्रम’ अन्तर्गत ज्येष्ठ, अशक्त र असहाय नागरिकका लागि निःशुल्क नसर्ने रोग स्क्रिनिङ र परामर्श सेवा सञ्चालन थालेको छ।
स्वास्थ्य महाशाखाको आयोजना र सहरी स्वास्थ्य प्रवर्द्धन केन्द्रको समन्वयमा पोखरा–८ सिमलचौरबाट सुरु गरिएको यो कार्यक्रम अन्य वडा र टोलमा पनि विस्तार गरिनेछ।
कार्यक्रमका प्रमुख कुश्मराज सुवेदीले घरदैलोमा पुगेर ज्येष्ठ र अशक्त नागरिकलाई स्वास्थ्य सेवा प्रदान गर्ने उद्देश्यले घुम्ती शिविर सञ्चालन गरिएको बताए। नसर्ने रोगको स्क्रिनिङसँगै महिलालाई प्रजनन स्वास्थ्य, मनोरोग, सरुवा रोग र दीर्घरोगसम्बन्धी जानकारी दिइनेछ।
असार ७ गतेसम्म वडा नं ८ का १७ वटा टोलमा यो सेवा दिइनेछ। हालसम्म आइतबार र सोमबार सञ्चालन भएको शिविरबाट ३०० भन्दा बढी लाभान्वित भएका छन्।
स्वास्थ्य महाशाखाका अनुसार, नियमित औषधि सेवन अनुगमन र सरकारले सूचीकृत औषधि निःशुल्क वितरण पनि भइरहेको छ। समुदायमा स्वास्थ्य सचेतना प्रवर्द्धनसमेत गरिरहेको बताइएको छ।
पोखरा महानगरपालिका प्रमुख धनराज आचार्यले सबै वडा र टोलमा घरदैलो स्वास्थ्य सेवा कार्यक्रम सञ्चालनमा महानगर प्रतिबद्ध रहेको बताए। गत वर्ष वडा नं २५ हेम्जामा ‘नागरिक आरोग्य कार्यक्रम’ अन्तर्गत निःशुल्क स्वास्थ्य सेवा प्रदान गरिएको थियो।
