काठमाडौं । परराष्ट्रमन्त्री डा. आरजु राणा देउवाले नेपाल रिपब्लिक मिडियाकी निर्देशक शोभा ज्ञवालीसँगको टेलिफोन संवादलाई ‘धम्की’का रूपमा सार्वजनिक गरिएकोप्रति आश्चर्य व्यक्त गरेकी छन्।
ज्ञवालीसँगको संवादमा कुनै धम्की नदिएको स्पष्ट पार्दै मन्त्री देउवाले सामाजिक सञ्जालमा सार्वजनिक भएको एक भ्रामक र तथ्यहीन भिडियो तथा त्यसको न्यायिक निरुपणसम्बन्धी कुरा भएको बताएकी छन्। उनले उक्त भिडियो प्रसारण गर्ने संस्था सरकारी निकायमा दर्ता नभएको पाइएकाले कानुनी प्रक्रिया अनुसार मुद्दा अघि बढाइएको उल्लेख गरेकी छन्।
“भिडियो पोष्ट गर्ने विरुद्ध अदालतले पक्राउ पूर्जी जारी गरेको छ, र हामी कानुनले तोकेको प्रक्रिया अनुसरण गर्दैछौं,” मन्त्री देउवाले बताइन्। उनले न्यूयोर्क टाइम्सजस्तो जिम्मेवार मिडियासमेत त्यसै भिडियोका आधारमा समाचार लेख्नु उचित नभएको भन्दै सत्य बुझेर मात्र समाचार प्रकाशन गर्न सुझाव दिएको उल्लेख गरिन्।
“फोन संवादलाई तोडमोड गरेर धम्कीको रूपमा प्रस्तुत गर्नु दु:खद हो,” उनले भनिन्। प्रेस स्वतन्त्रता र जिम्मेवारीबारे स्पष्ट धारणा राख्दै उनले लोकतन्त्रमा मिडियाले पीडितमैत्री र विश्वसनीय हुनुपर्ने धारणा व्यक्त गरेकी छन्।
परराष्ट्रमन्त्री देउवाको स्पष्ट सन्देश :
माननीय परराष्ट्रमन्त्रीज्यूको भनाई नेपाल रिपब्लिक मिडियाकी निर्देशक शोभा ज्ञवालीसँग हिजो भएको टेलिफोन कुराकानीलाई धम्की दिएको भनी उनको पत्रिका नागरिक दैनिकमा समाचार प्रकाशित भएको देखेर आश्चर्य चकित भएकी छु । हाम्रो परिवारलाई बदनाम गराउने दुसित मनासय सहित सामाजिक संजालमा आएको एक तथ्यहीन र भ्रामक भिडियो र त्यसको न्यायिक निरुपणमा बारेमा उहाँसँग कुराकानी भएको हो । उक्त भ्रामक र तथ्यहीन भिडियो प्रसारण गर्ने संस्था कुनै पनि सरकारी निकायमा दर्ता समेत नभएको थाहा पाएपछि प्रेस काउन्सिल मार्फत प्रक्रिया सुरु गर्न नमिलेर हामीले राज्यको कानुन अनुसार नै न्याय खोजेका हौँ । उक्त भ्रामक भिडियो पोष्ट गर्ने विरुद्द अदालतले पक्राउ पूर्जी जारी गरेको छ र कानुनले जे सजायँ दिन्छ हामीले पनि त्यसैलाई अनुसरण गर्ने नै हो । यसै विषयमा मैले उहाँलाई जानकारी गराएको थिएँ । बरु मैले म आफु नियमित पाठक रहेको न्युयोर्क टाइम्सजस्तो मिडियाको सहयात्री प्रकाशनले पनि सोही भ्रामक भिडियोलाई स्रोत मानेर समाचार प्रकाशन गर्नुभन्दा सत्य तथ्य बुझेर मात्र समाचार प्रकाशन गर्नुपर्ने सुझाव दिएकी हुँ। तर हामीबीच भएको फोन संवादलाई तोडमोड गरेर उहाँले आफूलाई धम्की आएको भनेर आफ्नै पत्रिकामा समाचार प्रकाशन गरेको देख्दा मलाई अचम्म लागेको छ ।
नेपालमा लोकतन्त्र, नागरिक अधिकार र प्रेस स्वतन्त्रताका लागि सबैभन्दा बढि संघर्ष गरेको नेपाली कांग्रेसको योगदानलाई कसैले बिर्सन मिल्दैन। म सोही पार्टीको एक जिम्मेवार सदस्य भएकाले मलाई प्रेस स्वतन्त्रताका बारेमा राम्ररी थाहा छ । तर मिडियाको सबैभन्दा ठूलो पक्ष जिम्मेवारीबोध र विश्वसनीयता गुमाउनुहुदैन भन्ने मेरो धारणा हो । लोकतन्त्र र प्रेस एक अर्काका परिपूरक भएकाले कुनै पनि व्यक्तिको वैयक्तिक स्वतन्त्रताप्रति मिडिया पनि जिम्मेवार हुनुपर्छ भन्ने मेरो धारणा हो । स्वभावैले मिडिया पिडितमैत्री हुन्छ भन्ने मेरो बुझाई हो। यसैका आधारमा राखिएका कतिपय धारणारुलाई प्रेसले धम्कीपूर्ण भाषाका रुपमा बुझ्नु दुःखद हो । ३० जेठ, २०८२
