जुम्ला। जिल्लाको पातारासी गाउँपालिका–३ छुमचौर जिउलोमा विश्वको उच्च स्थानमा फल्ने मार्सीधानको रोपाइँ सुरु भएको छ। जिल्लास्थित कृषि विकास कार्यालयले सोमबार धान महोत्सव आयोजना गरी रोपाइँको शुभारम्भ गरेको हो।
कृषि विकास कार्यालय र पातारासी गाउँपालिकाको मार्सी धान संरक्षण तथा प्रवर्द्धन केन्द्रको संयुक्त आयोजनामा रोपाइँ महोत्सव सम्पन्न भएको कार्यालयका प्रमुख रामभक्त अधिकारीले जानकारी दिए। स्वदेशी तथा विदेशीहरूको रोजाइमा परेको मार्सीधानको संरक्षण, संवर्द्धन र प्रवर्द्धनका लागि रोपाइँ महोत्सव तथा धान दिवस मनाइएको उनले बताए।
यहाँ विगतका वर्षहरूदेखि नै धान रोपाइँ हुँदै आएको पातारासी–३ का वडाध्यक्ष गोविन्द रावतले जानकारी दिए। संघीय सरकारको सहयोगमा धान संरक्षण गर्ने उद्देश्यले छुमचौर जिउलोको आधा क्षेत्रमा घेरबार गरिएको र पूरै क्षेत्र घेरबार भएमा काली मार्सी धानको खेती अझ बढ्ने उनले बताए।
विश्वको सबैभन्दा अग्लो ठाउँमा फल्ने धान यहाँ उत्पादन हुने भन्दै यसको संरक्षण र प्रवर्द्धनमा पालिका लागिपरेको पातारासी गाउँपालिकाका उपाध्यक्ष जनमाया रोकायाले उल्लेख गरिन्। समुद्री सतहबाट दुई हजार ८५० मिटर उचाइमा पर्ने छुमचौरमा धानखेती सुरु भएपछि जिल्लामा विभिन्न कार्यक्रम गरी रोपाइँ थालिएको हो।
सिञ्जा सभ्यताको इतिहाससँग जोडिएको जुम्लामा मार्सी धान लोप हुने अवस्थामा पुगेपछि कृषक, स्थानीय सरकारलगायत सरोकार भएका निकायहरू यसको संरक्षण र प्रवर्द्धनमा सक्रिय भएका उपाध्यक्ष रोकायाले बताइन्। जिल्लामा दुई हजार ८०० हेक्टर क्षेत्रफलमा धानखेती हुने कृषि विकास कार्यालयले जनाएको छ।
