पोखरा, ३० पुस । गण्डकी प्रदेश प्रमुख पृथ्वीमान गुरुङले गण्डकी प्रदेश सभाको सभामुखमा निर्वाचित कृष्ण प्रसाद धिताललाई सपथ ग्रहण गराउनुभएको छ । प्रदेश सभाबाट शनिवार दिउँसो निर्वाचित सभामुख धिताललाई प्रदेश प्रमुख गुरुङले आफ्नै निवास सिमलचौरमा शनिवार साँझ एक कार्यक्रमको आयोजना गरी पद तथा गोपनीयताको सपथ ग्रहण गराउनुभएको हो ।
सपथ ग्रहण कार्यक्रममा गण्डकी प्रदेशका मुख्यमन्त्री खगराज अधिकारी, मन्त्रीहरु, प्रतिपक्ष दलका नेता तथा गण्डकी प्रदेशबाट प्रतिनिधित्व गर्ने सांसद लगायतको उपस्थिति रहेको थियो । सपथ ग्रहणपछि सभामुख धितालले प्रदेश प्रमुख समक्ष आफ्नो परिचय दिनुभएको थियो । सभामुखमा निर्वाचित धिताल गोरखा १ को (१)बाट निर्वाचित सांसद हुनुहुन्छ ।
शनिवार दिउँसो सम्पन्न निर्वाचनमा सभामुख धितालले ३२ मत प्राप्त गर्नुभएको थियो भने उहाँको विपक्षमा २६ मत खसेको थियो । नेकपा माओवादी केन्द्रका फडिन्द्र देवकोटाको प्रस्ताव र नेकपा एमालेका रोसन गाहा मगरको समर्थनमा प्रस्तावित धितालको पक्षमा सत्तारुढ दलसँगै प्रतिपक्षमा बसेका एक जना सांसदलेपनि मतदान गरे ।
धितालाई सभामुख बनाउने पक्षमा सत्तारुढ नेकपा एमालेका २१, नेकपा माओवादी केन्द्रका ८ र राप्रपाका २ र एक स्वतन्त्र सांसदले मतदान गर्नुभएको थियो । विपक्षमा भने नेपाली कांग्रेसका २६ जनाले मतदान गर्नुभएको थियो । ६० सदस्यीय गण्डकी प्रदेश सभामा बैठकको अध्यक्षता गर्नुभएका मित्रलाल बस्यालले मतदानमा भाग लिन पाउनुभएन ।
सभामुखमा नेपाली कांग्रेसकी सरस्वती अर्याल तिवारी पनि उम्मेदवार बन्नुभएको थियो । उहाँले काँग्रेसका २६ मत प्राप्त गर्नुभयो ।
