काठमाडौं । गौर नगरपालिका–४ स्थित राइजिङ नेपाल सुधार केन्द्रमा एक व्यक्तिमाथि भएको अमानवीय कुटपिटको भिडिओ सार्वजनिक भएपछि प्रहरीले अनुसन्धान सुरु गरेको छ।
४१ सेकेन्ड लामो भिडिओमा तीन जना व्यक्तिले एकजनालाई लडाएर समाइरहेका छन् भने चौथो व्यक्तिले उनको पैतलामा पाइप जस्तो वस्तु प्रयोग गरी कुटिरहेको देखिन्छ। पृष्ठभूमिमा संगीत बजाइएकोले पीडितको चिच्याउने आवाज सुन्न नसकिनेगरी भिडिओ बनाइएको छ।
घटनाको पुष्टि गर्दै जिल्ला प्रहरी कार्यालय रौतहटका डीएसपी दीपक कुमार रायले भने, “भिडिओ सार्वजनिक भएपछि हामीले अनुसन्धान सुरु गरिसकेका छौं। सुधार केन्द्रका सञ्चालकलाई पनि प्रहरी कार्यालयमा बोलाएर सोधपुछ भइरहेको छ।” प्रहरीले भिडिओको सत्यता पुष्टि भएपछि कानुनी कारबाही अघि बढाइने जनाएको छ।
