काठमाण्डु – इजरायलले दुई बेलायती सांसदलाई आफ्नो देशमा प्रवेश गर्ने प्रक्रिया अस्वीकार गर्दै विमानस्थलकै हिरासतमा राखेको छ ।
बेलायती विदेशमन्त्री डेभिड ल्यामीले यस घटनामा प्रतिक्रिया दिँदै बेलायती संसदका सदस्यलाई यस्तो व्यवहार गर्न नहुने बताएका छन् । वास्तवमा लेबर पार्टीका सदस्य र बेलायती सांसद युआन याङ र अब्तिसाम मोहम्मद दुवै इजरायल पुगेका थिए। तर, इजरायली सरकारले उनीहरू दुवैले सुरक्षा बलको गतिविधिलाई ‘डकुमेन्ट’ गर्ने र ‘इजरायलविरुद्ध घृणा फैलाउने’ योजना बनाएको भन्दै उनीहरूलाई देश प्रवेशको अनुमति दिन अस्वीकार गरेको हो ।
अर्ली र वुडलीका सांसद युआन याङ र शेफिल्ड सेन्ट्रलका सांसद अब्टिसाम मोहम्मद दुवै बेलायतबाट इजरायल गएका थिए। उनी संसदीय प्रतिनिधि मण्डलको सदस्य भएर त्यहाँ पुगेका थिए तर इजरायल सरकारले उनलाई विमानस्थलमै हिरासतमा लिएको हो । बेलायती विदेशमन्त्री डेभिड ल्यामीले यस घटनाप्रति कडा प्रतिक्रिया दिँदै यो बेलायती सांसदहरूमाथि अन्याय भएको बताए । उनले भने, ‘हामीले इजरायली सरकारसँग यस विषयमा आफ्नो अडान स्पष्ट गरिसकेका छौं र दुवै सांसदसँग रातभर सम्पर्क राखेका छौं, ताकि उनीहरूलाई समर्थन गर्न सकियोस्।’
बेलायती सरकारले युद्ध र हिंसालाई रोक्न मध्यपूर्वमा युद्धविराम र शान्ति प्रक्रियामा फर्कनेमा आफ्नो ध्यान केन्द्रित गरेको बताएको छ। इजरायलले याङ र मोहम्मदले त्यहाँको सुरक्षा गतिविधिको अनुगमन गरेको र इजरायल विरोधी प्रचार फैलाएको आरोप लगाएको छ । यद्यपि, बेलायती सांसदहरूले आफूहरू नियमित संसदीय भ्रमणमा मात्रै रहेको र उनीहरूको उद्देश्य शान्ति प्रक्रियामा सघाउने रहेको बताएका छन्। बेलायत र इजरायलबीचको यो तनावपूर्ण अवस्था अझ जटिल हुनसक्छ किनभने बेलायतले बेलायती संसदका सदस्यहरू विरुद्धको यो कारबाहीलाई अस्वीकार्य र असंवेदनशील भनेको छ।
बेलायती सरकार यस विषयमा इजरायली सरकारसँग निरन्तर सम्पर्कमा रहेको छ। यो घटनापछि दुई देशको सम्बन्धमा केही तनाव आउन सक्छ तर छिट्टै समाधान हुने अपेक्षा गरिएको छ । यो विवादले बेलायतमा राजनीतिक सर्कलमा मात्रै होइन, आम जनतामा पनि आक्रोशको लहर पैदा गरेको छ । अब इजरायली सरकारले यस विषयमा कस्तो प्रतिक्रिया दिन्छ र बेलायती सांसदहरू त्यहाँबाट छिट्टै रिहा हुन्छन् कि भनेर हेर्न बाँकी छ।
