काठमाडौं । नेपाली कांग्रेसले आगामी माघ ९ गतेसम्म प्रतिनिधि सभा सदस्यहरूलाई काठमाडौं नछाड्न ह्वीप जारी गरेको छ ।
बदलिँदो राजनीतिक परिस्थितिका कारण सांसदहरूसँग जुनसुकै बेलामा पनि छलफल गर्नुपर्ने भन्दै बिना जानकारी काठमाडौं नछाड्न सांसदहरूलाई कांग्रेसले ह्वीप लगाएको हो ।
बदलिँदो राजनीतिक परिस्थिति, सरकारले संसदमा लिएको विश्वासको मत, सभामुख–उपसभामुखको निर्वाचन लगायत कारण सांसदहरूलाई काठमाडौं नछाड्न ह्वीप लगाइएको सांसद वीरबहादुर बलायरले जानकारी दिएका छन् ।
कांग्रेसले एमाले गठबन्धनबाट प्रधानमन्त्री बनेका पुष्पकमल दाहाल प्रचण्डलाई मंगलबार (२६ पुस) मा संघीय संसदको प्रतिनिधिसभामा विश्वासको मत दिएको थियो । उनले लगभग सबैजसो सांसदको विश्वास पाएका छन् ।
प्रतिपक्षमा बस्नेगरी कांग्रेसले प्रचण्डलाई विश्वासको मत दिए पनि कांग्रेस सभापति शेरबहादुर देउवा र प्रधानमन्त्री प्रचण्डबीच केही राजनीतिक लेनदेनको समझदारी भएको अनुमान गरिएको छ ।
यस्तो राजनीतिक चर्चा चलिरहेका बेला कांग्रेसले कुनै पनि बेला छलफल गर्नपर्ने हुनसक्छ भन्दै सांसदहरुलाई उपत्यका नछाड्न भनेको हो । प्रचण्डलाई विश्वासको मत दिनेबारे कांग्रेसमा दुई धार देखिँदा महामन्त्रीद्वय गगन थापा र विश्वप्रकाश शर्मा तथा नेताहरु अर्जुननरसिंह केसी, प्रकाशमान सिंह र प्रदीप पौडेलले सरकारलाई विश्वासको मत दिने विषयमा विमती जनाएका थिए ।
सभामुखको निर्वाचनसमेत गर्ने प्रयोजनका लागि माघ ५ गते प्रतिनिधिसभाको बैठक बोलाइएको छ । माघ ९ मा भने उपसभामुखको निर्वाचन गराउने तयारी छ ।
