बनियानी (झापा)।सशस्त्र प्रहरी बलले झापाबाट १ हजार ६३६ किलो गाँजासहित दुई जनालाई पक्राउ गरेको छ। प्रहरीले बुद्धशान्ति गाउँपालिका–४ मेची राजमार्गबाट दुई ट्रकसहित उनीहरूलाई नियन्त्रणमा लिएको हो।
इलामबाट झापातर्फ आउँदै गरेको को १ ख ५००१ र प्र १–०२–००२ ख ०५८४ नम्बरको ट्रकबाट सशस्त्र प्रहरी बलको टोलीले शुक्रबार उनीहरूलाई नियन्त्रणमा लिएको सशस्त्र प्रहरी बल नेपाल नं. १ बराह बाहिनीका सशस्त्र प्रहरी उपरीक्षक विक्रम हुमागाईँले जानकारी दिए।
पक्राउ पर्नेमा धनकुटाको शहिदभूमि नगरपालिका–४ का महेश राई र इलामको माईजोगाई गाउँपालिका–२ का गङ्गाबहादुर बस्नेत रहेका छन्। प्रहरीले जाँच गर्दा ट्रकमा ५७ बोरामा राखेर ल्याउँदै गरेको गाँजा बरामद गरेको हो। उनीहरूको साथबाट रु. ८७ हजार र पाँच थान मोबाइलसमेत बरामद भएको छ। उनीहरूलाई ट्रकसहित आवश्यक कारबाहीका लागि जिल्ला प्रहरी कार्यालय झापामा बुझाइएको छ।
