मेक्सिको । अमेरिकी राष्ट्रपति जो बाइडन उत्तर अमेरिकी नेताहरुको शिखर सम्मेलनमा सहभागी हुन मेक्सिको पुगेका छन् ।
ऊर्जा, आर्थिक सहयोग, आप्रवासन, लागुऔषध ओसारपसार लगायतका विषयमा केन्द्रित रहँदै अमेरिका, मेक्सिको र क्यानडाका नेताहरुको सम्मेलन आजदेखि मेक्सिकोमा सुरु हुँदैछ । सम्मेलन तीन दिनसम्म चल्नेछ ।
मेक्सिको उड्नुअघि बाइडनले सीमा नीति परिवर्तनको घोषणा गरेका थिए । जसअनुसार अमेरिका प्रवेश गर्ने क्युबाली, हैटियन, निकारागुवाली लगायत मुलुकका आप्रवासीलाई अध्यागमनले कारबाही गरी फिर्ता पठाइने कार्य कडाइका साथ लागू गरिनेछ । यसका लागि मेक्सिकोको सहयोग लिने अमेरिकाको नीति छ ।
मेक्सिको सीमाबाट दैनिक रुपमा ३० हजार आप्रवासीहरुलाई प्रवेश गर्ने गरेको तथ्यांक छ । अमेरिकी सीमा अधिकारीहरुले सन् २०२२ को सेप्टेम्बरसम्ममा मेक्सिको सीमानजिक २२ लाख आप्रवासी नियन्त्रणमा लिएको जनाएका छन् । बाइडेनले अमेरिका र मेक्सिकोको सीमा छुट्याउने पर्खालको पनि अवलोकन गरेको अन्तर्राष्ट्रिय सञ्चारमाध्यमले जनाएका छन् ।
बाइडेनले दुई वर्षअघि कार्यकालको पहिलो दिनमै अध्यागमन सुधार योजना कंग्रेसमा पठाएका थिए । तर, विपक्षी रिपब्लिकनको अवरोधपछि साढे ३ अर्ब डलरको प्रस्ताव पारित हुन सकेको थिएन ।
