यतिबेला नेपाली काँग्रेसका प्रभावशाली नेताहरुमा १५औँ महाधिवेशनको चटारो सुरु भएको छ । यही मेसोमा काँग्रेसको विरासत बोकेका तीन नेता पनि महाधिवेशन केन्द्रित संवादमा जुटेका छन् । नेपाली कांग्रेसका संस्थापक नेता बीपी कोइरालाका पुत्र शशांक कोइराला, गणेशमानसिंह पुत्र प्रकाशमान सिंह तथा महेन्द्रनारायण निधिका पुत्र विमलेन्द्र निधिबिच एकपछि अर्को ‘लञ्च मिटिङ’ हुन थालेको छ ।
विधानसम्मत कांग्रेसको केन्द्रीय महाधिवेशन सुरु हुन एक वर्ष बाँकी छ । विधानमै टेकेर एक वर्ष समय थप गरे महाधिवेशन २०८३ को मंसिर अन्तिममा सुरु हुनेछ । तर, तीन नेता भने अहिलेबाटै महाधिवेशनको सन्देश दिन र नेतृत्वमा पुग्ने चाहनासहित संवादमा जुटेका छन् । यी तीन नेताले गत असोज पहिलो हप्ता पार्टी पूर्वमहामन्त्री शशांक कोइरालाको निवासमा लञ्च मिटिङ गरेका थिए । कोइरालाको निवास महाराजगञ्जमा आयोजित लञ्च मिटिङमा पूर्वउपसभापति विमलेन्द्र निधि र पूर्वमहामन्त्री प्रकाशमान सिंह सहभागी थिए ।
त्यसपश्चात यी तीन नेताले गत बुधबार मात्र सिंहको निवास चाक्सीबारीमा अर्को लञ्च मिटिङ गरे । उनीहरूको सचिवालयबाट तस्बिर बाहिरिएपश्चात भेटको सन्देश तल्लो तहका कार्यकर्ता र पार्टीको विभिन्न संरचनासम्म पुगेको छ । नेतृत्वमा पुग्ने भन्दै यी तीन नेताहरूले पार्टीको १४ औँ महाधिवेशनमा पनि पटकपटक संवाद र छलफल गरेका थिए । एक अर्कालाई सहयोग गरेरै अघि बढ्ने उनीहरूको भनाइ थियो । तर, अन्तिम समयमा निधि र सिंह सभापतिमा लड्दा कोइराला भने चुपचाप बसेका थिए । अर्थात सहमतिअनुसार उनीहरू अघि बढेका थिएनन् । यसपटक भने सहमति अनुरुप अघि बढ्ने तीन नेताको तयारी छ ।
त्यसो त महाधिवेशनबाट नेतृत्वमा स्थापित हुन अन्य नेताहरू पनि लागिरहेकै छन् । शेखर कोइराला घोषणा गरेरै जिल्ला दौडाहामा छन् । महामन्त्री गगनकुमार थापाले पनि महाधिवेशनको तीव्र तयारी गरिरहेका छन् । यसबाहेक उपसभापति पूर्णबहादुर खड्का पनि सभापतिमा उम्मेदवार हुने सम्भावना उस्तै छ । स्वाभाविक रूपमा १४ औँ महाधिवेशन लडेका प्रकाशमान र विमलेन्द्र पनि महाधिवेशन लड्ने र नेतृत्व आफ्नो पक्षमा पार्ने रणनीतिमा लागेकै छन् ।
गत महाअधिवेशनमा एक तहमा शक्ति परीक्षण गरिसकेका नेताहरूले यसपटक सभापति शेरबहादुर देउवाको समर्थनमा अघि बढ्ने तयारी गरेको विश्लेषण पनि पार्टीभित्र हुने गरेको छ । २ कार्यकाल पार्टी सभापति बनेका देउवालाई तेस्रो कार्यकालमा सभापति बन्न विधानले दिँदैन । त्यसैले पनि देउवाको सहयोग पाउने गरी यी तीनै नेता दौडधुपमा लागेको हुन सक्ने विश्लेषण भइरहेको छ । आफूहरू एक रहेको सन्देश दिने र देउवाको समर्थन लिने प्रयासको रूपमा पनि यसलाई अथ्र्याउने गरिन्छ ।
भावी नेतृत्वको विषय रणनीतिक भएकाले देउवा अहिले नै मुख खोल्न चाहँदैनन् । किनकि अहिले नै उत्तराधिकारी घोषणा गर्दा अर्को पक्षलाई रणनीति बनाउन सहजता हुनेछ । यसैले सभापतिको सम्भावित दाबेदारको नाम सतहमा ल्याएर जोखिम मोल्ने पक्षमा देउवा देखिदैनन् । देउवा अहिले पनि केन्द्र, प्रदेश, जिल्ला सबैतिर बलियो पकडमा छन् ।
यसैले अहिलेकै संगठित शक्ति र निकट नेताको भरपुर प्रयोग गर्ने र काम लिने दाउमा देउवा छन् । यही बलियो शक्तिमार्फत सदस्यता वितरण, क्षेत्र र जिल्लाको अधिवेशनमा वर्चस्व स्थापित गर्ने दाउमा छन् । यसैले महाधिवेशन प्रतिनिधि छानिने क्षेत्रीय अधिवेशनको शक्ति सञ्चयका स्थितिको मूल्यांकनसम्म देउवाले मुख नखोल्ने नीति लिएका छन् ।
