काठमाडौं। नेकपा एमालेका अध्यक्ष तथा प्रधानमन्त्री केपी शर्मा ओलीले ०८४ सालको मंसिर महिनामा मात्र वर्तमान सत्ता गठबन्धन परिवर्तन हुने दाबी गरेका छन्। आज पार्टीको संसदीय दलको बैठकमा ओलीले भने, “दिनहुँ सरकार ढल्छ भन्ने हल्ला फैलाइएको छ, तर सरकार ०८४ सालसम्म टिक्नेछ।”
“अलिक भरेसम्म सरकार ढल्छ, साँझसम्म ढल्छ, राति नै ढल्छ, भोलि बिहानै ढल्छ,” ओलीले भने, “तर त्यो ढल्ने कुरा कहिले सरेर अर्को महिना, साउनमा सरेर भदौमा, भदौमा पनि ढल्न नसकेर दशैंसम्म, दशैंमा पनि ढल्न नसकेर मंसिरसम्म जान्छ। कुन मंसिरमा? ०८४ को मंसिरमा सरकार ढल्छ। के परिणाम आउँछ, त्यसअनुसार सरकार ढल्छ।
बैठकमा ओलीले संसद्मा पूर्ण समय बस्न र समितिका बैठकहरूमा सक्रिय सहभागीता जनाउन निर्देशन पनि दिएका छन्। “समितिहरुमा हाम्रो उपस्थिति तुलनात्मक रूपमा राम्रो छ, तर केवल तुलनात्मक रूपमा। त्यसैले, संसद्मा र समितिहरूमा हाम्रो उपस्थिति पूर्ण समय हुनुपर्दछ,” ओलीले भने, “कुनै पनि कुरा गलत ढंगले पारित हुनु हुँदैन। अनुपस्थित रहनु भनेको के पारित हुन्छ र के पारित हुँदैन भन्ने कुरा थाहा नपाउनु हो।”
