१५ महिनादेखि जारी इजरायल–हमास युद्ध अन्त्य र बन्धकहरू रिहा गर्ने सहमति भएको छ।
कतार र अमेरिकाको लामो समयको मध्यस्थता प्रयासपछि बहुप्रतीक्षित युद्धविराम गर्ने तथा बन्धकहरू छाड्ने सहमति भएको बीबीसीले जनाएको छ।
कतारका प्रधानमन्त्री शेख मोहम्मद बिन अब्दुल रहमान अल–थानीले आइतबारबाट युद्धविराम कार्यान्वयनमा आउने बताएका छन्। त्यसबेलासम्म इजरायली मन्त्रिपरिषद्बाट युद्धविराम सम्झौता स्वीकृत हुने बताइएको छ।
करिब छ सातामा युद्धविराम प्रक्रिया सम्पन्न हुने बताइएको छ। पहिलो चरणमा केही इजरायली बन्धकहरू छाडिने र त्यसको बदलामा इजरायलले प्यालेस्टिनी बन्दीहरू छाड्ने र केही क्षेत्रबाट इजरायली फौज फिर्ता हुने बीबीसीले जनाएको छ।
अमेरिकी राष्ट्रपति जो बाइडनले सम्झौताको पुष्टि गरेका छन्। सम्झौतामा पूर्ण युद्धविराम, गाजाबाट इजरायली फौज फिर्ता र हमाससँग भएका सबै बन्धकहरूको रिहा समेटिएको बाइडेनले बताएका छन्।
तर, बीबीसीले भने पहिलो चरण सफल भएमा स्थायी युद्धविरामका लागि वार्ताहरू हुने खुलासा गरेको छ।
सम्झौताको खबर बाहिरिएसँगै गाजाभर हर्षोल्लास छाएको छ। मानिसहरू प्यालेस्टिनी झण्डा बोकेर नाराबाजी गर्दै खुसी साटिरहेको दृश्यहरू सार्वजनिक भएका छन्। इजरेली बन्धकहरूका परिवारहरूले पनि राहत महसुस गरेका छन्।
यद्यपि सम्झौता पूर्ण रूपमा कार्यान्वयन हुने नहुनेमा उनीहरू चिन्तितसमेत देखिन्छ।
