काठमाडौं । प्रधानमन्त्री केपी शर्मा ओली वर्तमान मन्त्रीहरुसँग सन्तुष्ट देखिएका छैनन । खासगरी एमालेकै मन्त्रीहरुसँग उनको असन्तुष्टि रहेको एमाले स्रोतले बताएको छ । त्यसैगरी कांग्रेसको तर्फबाट उर्जामन्त्री दीपक खड्का र खेलकुद मन्त्री बनेका तेजुलाल चौधरीसँगपनि प्रधानमन्त्री असन्तुष्ट बनेका छन् । यता एमालेको तर्फबाट भौतिक मन्त्री बनेका देवेन्द्र दाहाल, उद्योग मन्त्री दामोदर भण्डारी र रक्षामन्त्री मानवीर राईसँग प्रधानमन्त्री असन्तुष्ट रहेको स्रोतको भनाइ छ ।
बालुवाटार स्रोतका अनुसार प्रधानमन्त्रीसमेत रहेका नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाबीच अर्थ र गृह मन्त्रालय साटफेर गर्नेबारेमा पटकपटक छलफल भएको छ । अहिले एमालेबाट अर्थमन्त्रीमा उपप्रधानमन्त्रीसहित अर्थमन्त्रीमा विष्णुप्रसाद पौडेल र गृहमन्त्रीमा कांग्रेसबाट नेता रमेश लखेक छन् । अब गृह एमालेलाई र अर्थ कांग्रेसलाई दिनेगरी साटफेरको छलफल भएको हो ।
प्रधानमन्त्री ओली कार्यसम्पादन सन्तोषजनक नदेखिएका केही मन्त्रीलाई बिदा गरेर नयाँ सांसदलाई मन्त्री बनाउने गृहकार्यमा छन् । त्यसबारे सत्ताको प्रमुख साझेदार दल नेपाली कांग्रेसका सभापति देउवासँग छलफल हुँदा गृह र अर्थ मन्त्रालय साटफेरको कुरा उठेको बालुवाटार स्रोतले जनाएको छ ।
एमाले नेताहरू पनि अनौपचारिक रूपमा मन्त्रालय साटफेरबारे कुरा उठेको बताएका छन । स्रोतका अनुसार कांग्रेसले अर्थमन्त्री पाउने अवस्था आएमा गृहमन्त्री लेखकलाई तानेर भौतिकमा पठाउने तयारी छ । लेखक यसअघि पनि भौतिकमन्त्री भएका थिए ।
सभापति देउवा र प्रधानमन्त्री ओलीसमेत कांग्रेस महामन्त्री गगन थापालाई अर्थमन्त्री बनाउन सकारात्मक छन् । तर, थापाले अर्थसहित उपप्रधानमन्त्री पनि पाउनुपर्ने माग राखेका छन् ।
थापालाई उपप्रधानमन्त्री दिँदा कांग्रेसबाट दुई उपप्रधानमन्त्री हुने भएकाले के गर्ने भन्नेमा नेताहरूबीच छलफल जारी रहेको स्रोत बताउँछ । कांग्रेसबाट अहिले उपप्रधानमन्त्रीसहित सहरी विकासमन्त्री भएर प्रकाशमान सिंहले नेतृत्व गरिरहेका छन् । एमालेमा भने पौडेललाई नै गृहसहित उपप्रधानमन्त्रीको जिम्मेवारी दिने गरी छलफल थालिएको छ ।
एमालेभित्र गुटगत हिसाब नमिल्दा ओली स्वयंले पौडेललाई अर्थबाट गृहमा सार्न खोजेको पनि उनी निकट नेताहरू बताउँछन् । एमालेमा पहिला ओलीको विश्वासपात्र रहेका उपाध्यक्ष पौडेल ओलीले महासचिव शंकर पोखरेललाई काखी च्यापेपछि पूर्वराष्ट्रपति विद्यादेवी भण्डारी निकट बनेको स्रोतहरू बताउँछन् । उता पौडेलले भने युवराज खतिवडालाई ओलीले आर्थिक सल्लाहकार बनाएर अर्थमा तगारो हालेको बुझाई रहेको छ । पौडेललाई खतिवडाले नै कतिपय सन्दर्भमा तगारो हालेको स्रोतको दावी छ ।
