काठमाडौँ- विगत दुई दशकमा भूमिगत पानी अत्यधिक शोषण गर्नाले पृथ्वीको अक्षलाई ३१.५ इन्चले ढल्किएको पत्ता लागेको छ ।
नयाँ अध्ययनका अनुसार पानीको यस पुनर्वितरणले विश्व स्तरमा समुन्द्री सतहमा करिब ०.२४ इन्चको वृद्धि समेत भएको छ ।
जियोफिजिकल रिसर्च लेटर्समा प्रकाशित अनुसन्धानले पृथ्वीको अक्षमा परिवर्तन आउनुमा सतहमुनीको पानी निकासीले महत्त्वपूर्ण भूमिका खेलेको देखाएको छ ।
सियोल नेशनल युनिभर्सिटीका भू– भौतिकशास्त्री कि विओन सिओमाटको नेतृत्वमा गरिएको अनुसन्धानले जलवायु परिवर्तन सम्बन्धित कारकहरू मध्ये यो पनि एक रहेको देखाएको छ । उक्त शोधका अनुसार सतहमुनीको पानी पुनर्वितरणले पृथ्वीका ध्रुवको झुकावमा सबैभन्दा ठूलो प्रभाव पारेको छ ।
अध्ययनका अनुसार सन् १९९३ देखि २०१० सम्म करिब २ हजार १ सय ५० गिगाटन भूमिगत पानी निकालिएको थियो । यसले ग्रहको झुकावमा ठूलो परिवर्तन ल्यायो । धेरै जसो पानी अन्ततः महासागरहरूमा जान्छ, जसले गर्दा समुद्रको सतह बढिरहेको छ ।
नासाका अनुसार पृथ्वीको यो झुकावका कारण पनि पृथ्वीमा मौसम परिवर्तनहरू भइरहेका छन् । अध्ययनका अनुसार हालैको झुकावले मौसममा छिटोछिटो परिवर्तन त गर्दैन तर यसले विश्वव्यापी जलवायु ढाँचालाई असर भने गर्न सक्छ।
