जे.के. रोलिङ बेलायती महारानी भन्दा पनि धनी छिन् । तर ह्यारी पोर्टर सिरिज लेख्दाको समयमा उनी साह्रै गरीब थिइन् । उनले आफ्नो पहिलो उपन्यास चरम् गरिबीको माहोलमा लेखेकी थिइन् । उनी बेरोजगार थिइन् । उनी सरकारले दिने बेरोजगार भत्तामा निर्वाह गरिरहेकी थिइन् । कयौँ दिन उनले भोको पेट सुत्नुपरेको थियो । पैसा नहुनाले उनले आफ्नो पहिलो उपन्यास थोत्रा कागजको पन्नाहरुमा लेखेकी थिइन् ।
उनको जीवन दुखै दुखले भरिएको थियो । न पति न नोकरी, साथमा सानी छोरी र बेरोजगार भत्तामा रहनाले अरु मानिसले गर्ने अपमानजनक व्यवहारले उनलाई अझै दृढ बनायो । तर पनि उनले परिस्थितिसँग संघर्ष गरिरहिन् । उनको मनमा ह्यारी पोर्टर उपन्यास छपाउने ठूलो सपना थियो । धेरै वर्षको कडा मेहनत पछि उनले ह्यारी पोर्टर एण्ड द फिलोसोफर्स स्टोन उपन्यास पूरा गरिन् । उनले उपन्यासको पाण्डुलिपी लिएर लिटेरी एजेन्टहरुकोमा धाउन थालिन् तर धेरै जसो एजेन्टहरुले उक्त उपन्यासमा केही दम छैन भन्ने जवाफ दिए । अन्त्यमा क्रिस्टोफर लिटिल नामक एजेन्टले रोलिङलाई सो उपन्यासबारे प्रकाशकसँग कुरा गरिदिने आश्वासन दिलाए ।
तर संघर्ष अझै बाँकी नै थियो । धेरै प्रकाशकहरुले यसलाई छाप्न अस्वीकार गरिदिए । कुनै पनि प्रकाशक एउटी नयाँ लेखिकाको पहिलो उपन्यास छाप्न तयार थिएनन् किनभने यसमा एउटा जादूगर बालकको कहानी थियो । आज पक्कै पनि ती प्रकाशकहरु आफ्नो अदूरदर्शितामाथि पछुताइरहेका होलान् । लामो दौडधुप अनि संघर्ष पछि ब्लुम्सबरी प्रकाशनले उनको रचना दुई हजार पाउण्डमा किन्यो । त्यसपछि जे भयो, त्यसले इतिहास सिर्जना ग¥यो । अमेरिकामा यो पुस्तकको प्रतिलिपि अधिकारको लागि रोलिङले एक लाख डलर पाइन् र यसको फिल्म अधिकारका लागि उनले मागेजति रकम पाइन् । रोलिङले प्रतिकूल परिस्थिति र कठिनाइहरु देखि हार नमान्नाले नै यो सम्भव भयो । उनले संघर्ष गरिन् र चुनौतिको सामना गर्दै सफलता हासिल गरिन् ।
साभारः ‘सफलता’ पुस्तकबाट
