काठमाडौैं । १० वर्षे सशस्त्र संघर्षपछि संसदीय राजनीतिमा प्रवेश गरेको नेकपा माओवादी केन्द्र अहिले प्रतिनिधि सभामा तेस्रो दलको हैसियतमा छ । संसद्को पहिलो र दोस्रो दल कांग्रेस र एमालेले नै सरकार निर्माणको सम्भाव्य समीकरणको अभ्यास गरिरहेका बेला माओवादी केन्द्रले पनि सरकारको नेतृत्व गर्ने चाहना देखाएको छ ।
संसदीय राजनीतिमा प्रवेश गरेपछि क्रमशः कमजोर बनेको माओवादी अहिलेको त्रिशंकु संसदमा निर्णायक जस्तै छ । यसैको फाइदा उठाउँदै अध्यक्ष पुष्पकमल दाहालले सरकारको नेतृत्व गर्ने चाहना देखाएका छन् ।
माओवादी केन्द्रका अध्यक्ष पुष्पकमल दाहाल दुई पटक प्रधानमन्त्री भइसकेका छन् । संविधानसभाको पहिलो निर्वाचनमा पहिलो दल बनेको माओवादीले एमाले र मधेसी मोर्चाको साथ लिएर अध्यक्ष दाहाललाई प्रधानमन्त्री बनाएको थियो । दोस्रो संविधानसभाको निर्वाचनमा तेस्रो दल बनेको माओवादीले संविधान निर्माणपछि बनेको सरकारको नेतृत्व गर्ने अवसर पायो । त्यो बेला कांग्रेस र मधेसी दलको सहयोगमा दाहाल प्रधानमन्त्री बने ।
२०७४ सालको निर्वाचनमा एमालेसँग गठबन्धन गरेका दाहालको प्रधानमन्त्री बन्ने चाहना भने पूरा भएन । अहिले कांग्रेससहितको गठबन्धन बनाएर चुनावमा गएको माओवादीले कमजोर तर तेस्रो हैसियतको नतिजा ल्याएको छ । गठबन्धन दलहरूलाई स्पष्ट बहुमत छैन । यही शक्ति सन्तुलनमा टेकेर माओवादी केन्द्रका अध्यक्ष दाहाल प्रधानमन्त्री बन्ने प्रयासमा देखिन्छन् ।
सकेसम्म गठबन्धनबाटै प्रधानमन्त्री बन्ने लालसा दाहालमा देखिन्छ । नसके एमाले, एकीकृत समाजवादी लगायत साना दलको सहयोग जुटाएर भए पनि नेतृत्वमा पुग्ने उनको चाहना छ । तर, अध्यक्ष दाहालको तेस्रो पटक प्रधानमन्त्री बन्ने उद्देश्य पूरा होला त रु
त्यसो त एमालेले पनि दाहाललाई सहज रूपमा प्रधानमन्त्री स्वीकार गर्छ भन्ने छैन । कांग्रेस पनि राष्ट्रपति र प्रधानमन्त्री दुवै पद नछाड्ने अडानमा छ । त्यसैले दाहाललाई प्रधानमन्त्री बन्न त्यति भने सहज छैन । तर त्रिशंकु संसद् र प्रदेश सरकारसम्मको समीकरण मिलाएर भए पनि दाहालले आफ्नो मनोकांक्षा पूरा नगर्लान् भन्न चाहिँ सकिँदैन ।
