तपाईं एकाबिहानै खानेकुरा खाँदै हुनुहुन्छ ? एकपटक ध्यानपूर्वक सोच्नुहोस् ।
के तपाईंको पेटमा वास्तविक भोक छ त ? यदि छ भने मात्र आफ्नो श्रम, उमेर र स्वास्थ्य अनुकूल उपयुक्त मात्रामा नास्ता गर्नु लाभकारी हुन्छ । यदि छैन भने पनि दिउँसोको खाना के कसो होला, कता होला, त्यसैले मौकामा पेट भरिहालौँ भन्ने सोचेर नास्ता लिँदै हुनुहुन्छ भने पर्खनुहोस् । यस्तो भोकविनाको पेट भराइले तपाईंलाई केही महिनाभित्रै रोगाधिले बनाउनेछ ।
यति हुँदाहुँदै पनि केही खाइहालौँ न त भन्नुहुन्छ भने गुलियो फलफूल उत्तम विकल्प हो । टुसाएको गेडागुडी अर्काे विकल्प हो । तर भुलेर पनि चिल्लोमा पकाएको, तारेको खाद्यवस्तु तथा कचौडी, समोसा, पुरी, जेरी, सेलरोटी, स्वारी, दुनट आदिलाई टाढैबाट नमस्कार गर्नु राम्रो हो ।
आयुर्वेदमा उल्लेखित मान्यतानुसार दूधको सेवन बिहानको समयमा हितकर हुँदैन किनकि दूधले कफ वृद्धि गर्दछ र पच्नका लागि शरीरले आराम खोज्दछ । साथै पच्न समय लाग्नाले तत्काल अर्काे खाने कुरालाई अनुमति दिँदैन ।
यदि दूध खानैप¥यो भने कुनै चिजसँग नमिलाई दूध मात्र खाने सल्लाह आहारविज्ञहरुले दिएका छन् । दूधसँग बिस्कुट, पाउरोटी, कर्नफ्लेक्स, ओटमिल दलिया नमिसाउँदा सुपाच्य हुन्छ । दूधमिश्रित नास्ता गर्नुपर्ने बाध्यता ती वस्तुलाई दूधमा पकाएर मात्रै गर्ने गरे स्वास्थ्यप्रद हुन्छ ।
दूध पिउनु एक घण्टाअगाडि र पिएपछि तीन घण्टापछि मात्र फलफूल खानु पेटका लागि उचित न्याय हुनेछ ।
ग्याष्ट्राइटिस तथा अम्लपित्तको समस्या यति धेरै फैलिएको छ कि झण्डै १० मा ७ नेपालीलाई यसले सताएको छ । पेट खाली राखेमा यसले सताउँछ भन्ने मान्यता धेरैजसोमा व्याप्त छ । ग्यास्ट्राइटिस तथा एसिडिटी हुने व्यक्तिका लागि अङ्कुरित गेडागुडी, गहुँ मकै जौको जमराको रस र खिचडी सबैभन्दा उत्तम ब्रेकफास्ट हुन् ।
साभारः ‘खाने कसरी पिउने कसरी’ पुस्तकबाट
