काठमाडौं । सरकारले विभिन्न देशका दुई हजार ३ सय ३६ विदेशी नागरिकलाई नेपालमा काम गर्न अनुमति दिएको छ । श्रम तथा व्यवसायजन्य सुरक्षा विभागले विभागले सार्वजनिक गरेको तथ्याङ्क अनुसार २०८०–८१ को ११ महिनामा सरकारले दुई हजार ३३६ विदेशी नागरिकलाई काम गर्ने अनुमति (श्रम स्वीकृति) दिएको हो ।
श्रम स्वीकृति लिएर नेपाल आउने ६९ देशका नागरिकमध्ये चिनियाँ नागरिकको संख्या उल्लेख्य रहेको विभागले जनाएको छ ।श्रम ऐनमा नेपालमा सञ्चालन भएका प्रतिष्ठानले पाँच प्रतिशत मात्र विदेशी श्रमिक राख्न सकिने प्रावधान छ । नेपालमा खासगरी विदेशी लगानीमा निर्माण भइरहेका ठुला आयोजना तथा परियोजनामा काम गर्न विदेशी आउने गरेका छन् ।
रोजगारीका लागि दैनिक औसतमा दुई हजार जनशक्ति विदेश गइरहेको अवस्थामा सरकारले उच्च दक्ष जनशक्ति नपाउँदा विदेशी नागरिकलाई काम गर्ने अनुमति दिँदै आएको छ ।
यसअघि आर्थिक वर्ष २०७९–८० मा विकास साझेदार कम्पनीको लगानीमा नेपालमा सञ्चालित परियोजना तथा विदेशी व्यावसायिक कम्पनीमा काम गर्न नेपालबाट श्रम स्वीकृति लिने विदेशीको सङ्ख्या दुई हजार ९९४ रहेको विभागको तथ्याङ्कमा उल्लेख छ ।
