काठमाडौं । तीन युरोपेली मुलुकले मान्यता दिएको केही दिनपछि स्लोभेनियाका सांसदहरूले मंगलबार प्यालेस्टिनी राज्यलाई मान्यता दिने वा नदिने भन्ने विषयमा मतदान गर्ने भएका छन् ।
सभामुख उर्स्का क्लाकोकर जुपान्सिकले लुब्जानामा पत्रकार सम्मेलन गरी यसबारे जानकारी दिए । सत्तारूढ गठबन्धनमा तीनवटा केन्द्र वामपन्थी दलहरूले गाजामा युद्धलाई चाँडोभन्दा चाँडो समाप्त गर्ने प्रयासअन्तर्गत प्यालेस्टिनी राज्यको मान्यतालाई समर्थन गर्छन् । ती दलहरूसँग संसद्को ९० सिटमा ५१ सिट छ ।
स्पेन, आयरल्याण्ड र नर्वेले यसै साता प्यालेस्टिनी राज्यलाई मान्यता दिएका छन् । यसबाट राष्ट्रसंघका १९३ सदस्य मुलुकमध्ये प्यालेस्टिनी राज्यलाई मान्यता दिने मुलुकको संख्या १४५ पुगेको प्यालेस्टिनी अधिकारीहरूले बताएका छन् । यसअघि बिहीबार स्लोभेनियाको केन्द्र–वामपन्थी सरकारले प्यालेस्टिनी राज्यलाई मान्यता दिने आदेश संसदीय अनुमोदनका लागि पठाएको थियो । यसबाट जुनको मध्यसम्ममा समाप्त हुने प्रक्रियामा तीव्रता आएको छ ।
‘यो शान्तिको सन्देश हो, हामी विश्वास गर्छौँ कि अहिले सम्पूर्ण विश्वले मध्यपूर्वमा शान्ति ल्याउने समाधानतर्फको प्रयासमा सहभागी हुने समय आएको छ, त्यो दुई–राज्यको समाधान हो’, प्रधानमन्त्री रोबर्ट गोलोबले पत्रकारहरूसँग भने । उनको पत्रकार सम्मेलनमा राजधानीमा प्रधानमन्त्री कार्यालयअगाडि स्लोभेनियाली र युरोपेली संघ (इयू) का साथै प्यालेस्टिनी झण्डा पनि फहराइएको थियो । आदेशका साथ स्लोभेनियाले सन् १९६७ को राष्ट्रसंघीय प्रस्ताव वा दुवै पक्षले गरेको भविष्यको शान्ति सम्झौताअनुसार निर्धारित क्षेत्रभित्र प्यालेस्टिनी राज्यलाई मान्यता दिनेछ ।
अप्रिलमा डेनभनिक दैनिकद्वारा प्रकाशित ६०० मानिसको सर्भेक्षणअनुसार करिब ६० प्रतिशत स्लोभेनियालीले प्यालेस्टिनी राज्यको मान्यतालाई समर्थन र २० प्रतिशतले यसको विरोध गर्छन् । कन्जरभेटिभ विपक्षी स्लोभेनियाई डेमोक्रेटिक पार्टी (एसडीएस) ले मान्यताको विरोध गर्दै स्लोभेनियाले इयुका बहुमत मुलुकसँग रहनुपर्ने बताएको छ ।
