काठमाडौँ । पहिरोले अवरुद्ध भएको महेन्द्रराजमार्ग अन्तर्गतको दाउन्ने सडक खण्डमा एकतर्फी यातायात सञ्चालन भएको छ ।
प्रहरीका अनुसार गएराति परेको पानीले दाउन्नेमा निर्माणधीन सडकको डाइभर्सन बगाउँदा आज बिहान ३ बजेदेखि सडक अवरुद्ध बनेको थियो । सडक केहीबेर अघिबाट एकतर्फी सञ्चालनमा आएको छ ।
जिल्ला प्रहरी कार्यालय कावासोतीका अनुसार सोमबार राति परेको पानीले गैँडाकोटको थुम्सीमा पहिरो गएपछि अवरुद्ध बनेको सडक अझै सञ्चालनमा आएको छैन । राजमार्ग अवरुद्ध हुँदा महेन्द्रराजमार्ग हुँदै पूर्वपश्चिम हिँडेका सैयौं यात्री आज बिहान ३ बजेदेखि थुम्सीमा अलपत्र परेका छन् ।
प्रहरीले अहिले डोजर प्रयोग गरेर राजमार्ग खुलाउने प्रयास भइरहेको जानकारी दिएको छ ।
महेन्द्रराजमार्ग फराकिलो पार्ने काम गरिरहेको चिनियाँ ठेकेदार कम्पनीले राजमार्ग भत्काएर छोडेको बर्सौँ भइसक्दा पनि काम नगरेकाले सानो वर्षा हुनासाथ ती स्थानमा राजमार्ग अवरुद्ध हुने गरेको छ ।
