टेलिभिजनमा कार्टुन हेर्ने एडिक्सन सँगसँगै आजका केटाकेटीलाई जङ्कफुड एडिक्सनले नराम्ररी गाँज्दै लागेको छ । एक जना आहारविज्ञको अनुमानित सर्वेक्षणअनुसार सहरिया वातावरणमा हुर्कने पचास प्रतिशत केटाकेटी फास्टफुड र जङ्कफुडलाई आफ्नो मुख्य खाना बनाउन चाहन्छन् । उता गाउँका केटोकटी पनि जङ्कफुड खाने मामलामा पछि छैनन् । आज गाउँगाउँ र कुनाकुनाका पसमाल पनि चाउचाउ, चिप्स, प्याकेटबन्द जङ्कफुड, चुइगम, चकलेट, क्याटबरी, बरफ र आइसक्रिमजस्ता जङ्कफुडहरु सजिलैसँग पाइन्छन् ।
बेलायतको लिभरपुल युनिभर्सिटीले गरेको एक अध्ययनले कार्टुन हेर्न मग्न हुने अबोध बालबालिकाको दिमाग भुट्ने गरी कार्टुन दृश्यको बिचबिचमा देखाइने जङ्कफुड तथा फास्टफुडको विज्ञापन निकै घातक हुने गरेको तथ्य बाहिर ल्याएको छ । हुन पनि हो, मुखै रसाउने गरी बनाइएका त्यस्ता विज्ञापनले केटाकेटीको बालबुद्धिलाई तुरुन्तै सम्मोहित नगर्ने कुरै भएन । उक्त अध्ययनले अर्काे कुरा के प्रष्ट्याएको छ भने सानै उमेरमा कुरुप हुने गरी मोटाउने स्थिति आउनुपछाडिको मुख्य कारण यही जङ्कफुड हो । अध्ययनमा भनिएको छ ः बच्चा जति मोटाउँदै जान्छ, त्यति नै उसभित्र जङ्कफुडप्रतिको आकर्षण बढ्दै जान्छ । स्मरण रहोस्, टिभीमा विज्ञापन हेर्नेबित्तिकै यदि कुनै बच्चालाई चाहे जति जङ्कफुड खान दिने हो भने उसले आफ्नो क्षमताभन्दा १ सय २४ प्रतिशत धेरै खाइदिन सक्छ ।
साभारः ‘खाने कसरी पिउने कसरी’ पुस्तकबाट
