नेपाली कांग्रेससँगको एक वर्षको सत्तायात्रा टुटाएर फेरि अहिले एमालेसँग गठबन्धन गरेर सरकारको नेतृत्व गरिरहेका प्रधानमन्त्री पुष्पकमल दाहाल अब बाँकी कार्यकाल पनि आफै नेतृत्वदायी भूमिका रहिरहने रणनीतिमा छन् । २०७९ पुष १०मा सरकार गठन हुदा एमालेको काध चढेर प्रधानमन्त्री बनेका दाहाल त्यसको दुई महिना पछि फेरि काँध फेरेर कांग्रेससँग हातेमालो गर्न पुगे ।
दुई–दुई–एकको सहमति सहित कांग्रेससँग गाँसिएका प्रधानमन्त्री दाहाल एक वर्षमै कांग्रेससँगको सहकार्य टुटाएर अहिले फेरि एमालेसँगैको समिकरणमा जोडिएका छन् । समीकरण अदलबदल गरेर भएपनि सत्ताको नेतृत्व आफूले नछोड्ने दाउँमा प्रधानमन्त्री दाहाल देखिन्छन् । दाहालले कांग्रेस र एमालेलाई पालैपालो उपयोग गरेर सरकार सञ्चालन गर्दै आएका छन् ।
तर आफू बाचुन्जेल मुलुकमा उथलपुथल गरिरहने बताउदै आएका प्रधानमन्त्री दाहालको अभिव्यक्तिलाई लिएर एमाले पनि सजग बनिरहेको छ । राजनीतिक स्थीरताका लागि स–साना दलहरुलाई पाखा लगाएर एमाले र कांग्रेस मिल्नुपर्ने चर्चा राजनीतिक वृतमा सुनिन थालेको छ । यता, कांग्रेसका नेताहरु पनि एमालेसँगको भेटघाट बढाउदै लगेका छन् । यद्यपी, प्रधानमन्त्री दाहाल आफू सत्ता बाहिर बस्नु पर्ने डरले कांग्रेसलाई एमालेसँग मिल्न नदिने कसरतमा छ ।
कांग्रेस र एमाले मिल्दा आफू प्रतिपक्षमा धकेलिनुपर्ने बाध्यता कारण प्रधानमन्त्री दाहाल एमालेलाई काखी च्याप्दै कांग्रेसलाई फकाइरहेको छ । कांग्रेस सत्तामा जाने दाउ खोजिरहेको बेला प्रधानमन्त्री दाहाल कांग्रेसलाई थुम्थुम्याइरहेका छन् । समीकरणमा सहभागी राष्ट्रिय स्वतन्त्र पार्टीका सभापति एवं गृहमन्त्री रवि लामिछाने सहकारी काण्डमा मुछिएको आरोपमा चौतर्फी विरोध खेपिरहेको बेला प्रधानमन्त्री दाहाललाई रास्वपालाई झेल्न मुश्किल पर्दै गएको छ । त्यसैले, रास्वपालाई समीकरणबाट आउट गराएर सत्ताउन्मुख देखिएको कांग्रेसलाई सरकार ल्याउने रणनीतिमा प्रधानमन्त्री दाहाल देखिन्छन् ।
३२ सिट सहितको माओवादी केन्द्र संसदको तेस्रो दल हो । ८८ सिट सहितको पहिलो दल कांग्रेस र ७६ सिटसहितको दोस्रो दल एमालेलाई तेस्रो दलका नेता पुष्पकमल दाहालले फनफन्ती घुमाउँदै आएका छन् । यो नै आफ्नो अन्तिम कार्यकाल भएको बुझेका प्रधानमन्त्री दाहालले बाँकी ३ तीन वर्षपनि यसरी नै कहिले कांग्रेस त कहिले एमालेलाई घुमाएर सत्ताको केन्द्रमै रहने रणनीतिमा देखिएका छन् ।
