प्रधानमन्त्री पुष्प कमल दाहालले सत्ता साझेदारी दल नेपाली काँग्रेससँगको सत्तागठनबन्धन तोडेर नयाँ समिकरणमा बनाएको सरकार अहिले सञ्चालनमा छन् । दाहालले नयाँ सत्ता साझेदारका रुपमा नेकपा एमाले, राष्ट्रिय स्वतन्त्र पार्टी, जनता समाजबादी पार्टी, एकीकृत समाजवादी पार्टीलाई समेटेका छन् । अहिले बनेको यो पाँच दलीय गठबन्धनको सरकारमा पनि विवादित व्यक्तिलाई सरकारमा सामेल गराएको भन्दै प्रतिपक्षी दल नेपाली काँग्रेसले सडक देखि सदन सम्म चर्को विरोध गर्दै आएको छ ।
एकल बहुमतको सरकारको अभावमा पाँच दलिय गठबन्धनका साथमा सरकार बनेपछि सत्तामा आएको समीकरण पछि संघमा मात्र प्रदेश सरकारका विषयमा किचलो बढेको छ । नयाँ समिकरणमा विवाद मिलाउन निकै नै कठिन देखिएको छ । हुन त यतिबेला नेकपा एमाले अध्यक्ष केपी शर्मा आली र प्रधानमन्त्री दाहालको भेटघाट निकै बाक्लो छ । तर पनि दुवै शिर्षनेताबिच गठबन्धनका विषयलाई लिएर विवाद हुने गरेको छ ।
यतिबेला प्रधानमन्त्री दाहालले पाँच दलिय गठबन्धनलाई फरक तरिकाले परिभाषित गरेका छन् । प्रधानमन्त्री दाहालले वामपन्थी शक्तिलाई एकै ठाउँ ल्याउने लक्ष्यका साथ नेकपा एमालेसँग सहकार्य गरेर गठबन्धन गरिएको बताउँदै आएका छन् । माओवादी केन्द्र अध्यक्ष तथा प्रधानमन्त्री दाहालले पार्टी मुख्यालय पेरिस डाँडामा बसेको विभिन्न पदाधिकारीको बैठकलाई सम्बोधन गर्दै वामपन्थी शक्तिलाई मिलाएर लाने र अहिलेको गठबन्धनलाई लामो समयसम्म टिकाउने लक्ष्य रहेको बताएका छन् ।
तर एमाले अध्यक्ष ओलीले भने सत्तासमिकरणका लागि मात्र माओवादीकेन्द्रसँग एमालेले गठबन्धन गरेको बताएका छन् । पार्टीका आ–आफ्नै छुट्टै कार्यक्रमहरू रहेकाले प्रधानमन्त्री दाहालले नयाँ गठबन्धनलाई गरेको परिभाषालाई एमालेले स्विकार्न नसक्ने एमाले अध्यक्षको भनाइ छ । यस्तै एमाले महासचिव शङ्कर पोखरेलले पनि एमालेको समग्र ध्यान मिसन ०८४ तर्फ भएको, बलियो राष्ट्रिय शक्ति बनाउनका लागि आफ्नो विरुद्धको घेराबन्दी तोड्नै पर्ने आवश्यकतामा केन्द्रित भएको उल्लेख गर्दै आएका छन् । सबै राजनीति दलहरू अहिले आगामी निर्वाचनमा पाटीलाई बलियो बनाएर लैजाने दिशामा लागेका छन् ।
वास्तवमा गठबन्धन अहिले कुनै पनि दलमा सरकार गठनका लागि बहुमत नपुग्ने भएकाले साना दलहरूसँग मिलेर सरकार बनाउने र निर्वाचनमा पाटीलाई बलियो बनाउन सहयोग पुग्ने उद्देश्यका साथ गठबन्धन गरिएको छ । यही गठबन्धनका कारण राजनीति दल अहिले पाटीमा विभिन्न गुट र उपगुटका कारण राजनीति वृत्तमा असन्तुलन आएको हो । फुटेका पार्टीहरू एक ठाउँमा आउने हो भने एकल बहुमतको सरकार गठनमा समस्या आउदैन्थ्यो ।
वि.सं. २०७४ असोजमा एमाले–माओवादीले वाम गठबन्धन बनाएपछि दुई तिहाइ निकट प्रतिनिधिसभा सिटका साथ अध्यक्ष ओली प्रधानमन्त्री बनेका थिए । यस्तै वर्ष २०७५ जेठ ३ मा त दुई पार्टीबिच एकता हुन पुगेको थियो । नेकपा बनेको केही समयमै अन्तर्विरोध चुलिँदै कालान्तरमा प्रतिनिधिसभा विघटन र पार्टी विभाजन हुन पुगेपछि नेकपा एमालेबाट बाहिरिएर पूर्व प्रधानमन्त्री माधवकुमार नेपालले अर्को पार्टी सञ्चालनमा ल्याएपछि अहिले नेकपा एमालेमा पनि एकल बहुमत ल्याउने पाटीको क्षमता छैन । अहिले कुनै पनि पाटीले निर्वाचनमा एकल बहुमत ल्याएर निर्वाचन जित्ने क्षमतामा नभएका कारण पाटीभित्र द्वन्द्व अवस्था सिर्जना हुनका साथै नेपालको राजनीतिले स्थायित्व पाउन नसकेको हो ।
