भनिन्छ प्रेमको जात, धर्म, वर्ग र उमेर हुन्न । त्यसैले त किशोर उमेर होस्, प्रौढ वा वृद्ध, जुनसुकै उमेरमा पनि प्रेमको जालमा मान्छे सजिलै फस्न सक्छ ।
प्रेम सम्बन्ध स्वस्थ छ भने त स्वास्थ्यलाई फाइदा गर्छ । शरीरमा सकारात्मक ऊर्जा पनि भर्छ । तर जब प्रेममा शंका अनि तनाव उत्पन्न हुन्छ त्यसले झनै असर गर्छ । उमेर अनुसारको प्रेम र त्यसबाट उत्पन्न हुने तनावको प्रतिक्रिया भने उमेर तथा व्यक्तिअनुसार फरक हुन्छ । किशोरकाल अनुभवको काँचो उमेर भएकाले सामान्य समस्याको परिणाम पनि जटिल हुनसक्छ । किशोरकालको प्रेमले ल्याएको तनाव र उल्झन तुलनात्मक रुपमा जटिल मात्र होइन व्यवस्थापन गर्न कठिन किसिमको समेत हुने गर्दछ ।
यदि अभिभावक सचेत हुने हो भने किशोर उमेरका सन्तानलाई ब्रेकअपपछि पनि सहज अवस्थामा फर्काउन सक्छन् ।
– सानै उमेरमा प्रेम गर्ने भन्दै छोराछोरीलाई हप्काउनुको साटो उनीहरूसँग खुलेर कुरा गर्नुपर्दछ । कसरी ब्रेकअप भयो भनेर सोध्ने र त्यसबाट बाहिर आउने उपाय खोज्नुपर्दछ । प्रेम र आकर्षणको सम्बन्ध बुझाउनुपर्दछ । किशोर कालमा हुने प्रेम वास्तविक प्रेम नभई आकर्षण हो भन्ने तर्कसहित बुझाउन सक्नुपदर्छ यसले उनीहरु तनावबाट बाहिर आउन सक्छन् ।
– आफ्ना सन्तानलाई पढाइको महत्वबारे सम्झाउनुपर्दछ । अहिलेको उमेर पढ्ने उमेर भएकाले प्रेममा भन्दा पढाइमा ध्यान दिन आग्रह गर्नुपर्दछ । पढाइ सकिएपछि गरिने वा हुने प्रेम वास्तविक हुन्छ र त्यसले ल्याउने सुखद् हुने भनी बुझाउनुपर्दछ । प्रेमका कारण बिग्रने पढाइले जीवनमा पार्ने असरबारे केही उदाहरणसहित सम्झाउने, बुझाउने गर्नुपदछ । यदि आफूलो यसो गर्न नसके परामर्शदाताको सहयोग पनि लिनुपर्दछ ।
– सबैभन्दा पहिला त अभिभावक सधैँ आफ्ना सन्तानको विश्वासपात्र बन्नुपर्दछ । कुनै साथी वा उनीहरुका विश्वासपात्रसँग खुलेर कुरा राख्छन् भने तिनलाई घरमा बोलाएर उनीहरुसँग कुरा गर्नुपर्दछ । उनीहरुलाई आफ्ना समस्या राख्न सहजीकरण गर्नुपर्दछ । यसो गरियो भने गलत निर्णयमा पुग्नबाट रोक्न सकिन्छ ।
– किशोर उमेरमा केही न केही सोख सुरु हुन्छ । आफ्ना सन्तानले के चीजमा रुचि देखाइरहेको छ त्यसैमा अगाडि बढ्न हौसला दिनुपर्दछ । त्यस कामको लागि उनीहरुलाई सहयोग गर्नुपर्दछ । यसरी पनि उनीहरुलाई गलत निर्णय लिनबाट रोक्न सकिन्छ ।
