संयुक्त राष्ट्रसङ्घीय विश्व खाद्य कार्यक्रमका अनुसार दक्षिण सुडानमा आगामी वर्ष पाँच वर्षमुनिका १६ लाखभन्दा बढी बालबालिका कुपोषणको सिकार हुने जोखिम रहेको देखिएको छ । देशका केही भागमा बर्सेनि बाढी आउने क्रम बढ्दै जाँदा जलमग्न क्षेत्रका बासिन्दाले खाना पाउनसमेत समस्या भोग्नुपरेको छ भने उनीहरू रोगको महामारीसँग पनि जुधिरहेका छन् ।
सन २०११ मा सुडानबाट स्वतन्त्र भएयता विश्वको सबैभन्दा नयाँ राष्ट्रले घातक द्वन्द्व, प्राकृतिक विपत्ति, आर्थिक बेचैनी र निरन्तर राजनीतिक कलहको सामना गर्दै आएको छ । गत बर्ष बाढीले जमिनको ठूलो भाग डुबाएको रुबकोना काउन्टीमा करिब सबै मानिसलाई २०२१ देखि साना टापुहरूमा बस्न बाध्य बनाएको छ, अप्रिलदेखि खाद्य असुरक्षाको त्रास १२० प्रतिशतभन्दा बढीले बढेको छ ।
देशको उत्तरी भागमा पर्ने काउन्टीले सन २०२४ को अप्रिलसम्ममा भोकमरीको भयावह अवस्थाको सामना गर्नुपर्ने अनुमान गरिएको छ । सुडानको क्रूर युद्धबाट भागेर भागेका लाखौं दक्षिण सुडानी शरणार्थीहरू स्वदेश फर्केपछि यो सङ्कट झनै जटिल बनेको छ । सुडानमा गत अप्रिलको मध्यमा सुरु भएको द्वन्द्वका कारण अहिलेसम्म १० हजारभन्दा बढीले ज्यान गुमाइसकेका सशस्त्र द्वन्द्व स्थान तथा घटना तथ्याङ्क कार्यक्रमको अनुमान छ । धेरै युद्धविरामहरू हिंसा रोक्न असफल भएका छन् । जसले व्यापक क्षेत्रमा मानवीय सङ्कटको भय बढाएको छ ।
विश्वको सबैभन्दा गरिब राष्ट्रमध्येको एक दक्षिण सुडानले आफ्नो आधा जीवन युद्धमा बिताएको छ र आज सत्ता साझेदारी गर्ने प्रतिद्वन्द्वी नेताहरूबीच पाँच वर्ष चलेको गृहयुद्धमा करिब तीन लाख ८० हजार व्यक्तिको मृत्यु भएको छ । संयुक्त राष्ट्रसङ्घले दक्षिण सुडानको नेतृत्वले रक्तपात मच्चाउन, राजनीतिक स्वतन्त्रतामाथि अंकुश लगाउन र सार्वजनिक सम्पत्ती दोहनमा भूमिका खेलेको भन्दै पटक–पटक आलोचना गर्दै आएको छ ।
दक्षिण सुडानसँग तेलको ठूलो भण्डार छ तर यो गम्भीर मानवीय सङ्कट मा रहेको विश्व बैंकले जनाएको छ । सुडानमा सन् २०२३ मा करिब ९४ लाख मानिस अर्थात ७६ प्रतिशत जनसंख्यालाई मानवीय सहायताको आवश्यकता हुने अनुमान गरिएको छ ।
