काठमाडौं । त्रिभुवन अन्तर्राष्ट्रिय विमानस्थलबाट हुने सुन तस्करी अझै रोकिएको छैन । करिब ६१ किलो तस्करीको सुन बरामद भएको पाँच महिना नपुग्दै विमानस्थलबाट लगातार सुन बरामद हुन थालेको छ ।
विमानस्थल भन्सार कार्यालय र विमानस्थल प्रहरीले एक दिनको अन्तरमा साढे २१ किलो सुन बरामद गरेका छन् । गएराति मात्रै विमानस्थलबाट साढे ६ किलो सुनसहित २ जना विदेशी नागरिक पक्राउ परेका छन् ।
विमानस्थल प्रहरी प्रमुख डिआईजी अर्जुन चन्दका अनुसार फ्लाइ दुबईको जहाज चढेर काठमाडौं आएका इजिप्टका नगरिन सेरिफ मोहम्मद मोहम्मद लाशिन र उनका सुडानी साथी ओस्मानलाई सुनहित नियन्त्रणमा लिएको जनाएको छ ।
गएराति ११ः५१ बजे त्रिभुवन अन्तर्राष्ट्रिय विमानस्थलमा अवतरण गरेको फ्लाई दुबईको एफ जेड ५७३ हवाई जहाजबाट उनीहरु काठमाडौं आएका थिए ।
त्यस्तै, बिहीबार मध्यराति त्रिभुवन अन्तर्राष्ट्रिय विमानस्थलबाट भन्सार विभागले १४ किलो सुन बरामद गरेको थियो । गोरखा बारपाकका चन्द्र घलेले ज्याकेट भित्रको भित्रि वस्त्रमा सुन लुकाएर ल्याएको अवस्थामा प्रक्राउ गरिएको थियो । चन्द्र घलेसँगै उक्त कार्यमा संलग्न गोरखाका मीनबहादुर घलेलाई समेत पक्राउ गरी हाल प्रहरी हिरासतमा राखिएको छ ।
पछिल्लो पाँच दिनमा मात्रै झण्डै ३० किलो अवैध सुन बरामद गरिएको छ । अपराध अनुसन्धान कार्यालयको अनुसार पछिल्लो पाँच दिनमा साढे २९ किलो सुन बरामद भएको छ ।
प्रहरीको काठमाडौं उपत्यका अपराध अनुसन्धान कार्यालयले न्युरोड र नागढुंगा नाकाबाट ९ किलो सुन नियन्त्रणमा लिएको छ । बिहीबार नै अपराध अनुसन्धान कार्यालयले काठमाडौंको नागढुंगा नाकाबाट २ किलो सुनसहित ३ जनालाई प्रक्राउ गरेको थियो । सुनसँगै रसुवाका विरु तामाङ, सुनिल भुजेल र ग्याल छिरिङ तामाङलाई प्रक्राउ गरिएको छ ।
विमानस्थलबाट ल्याएको सुन बरामद हुन थालेपछि पछिल्लो समय रसुवा, दोलखा, सिन्धुपाल्चोक, गोरखा लगायतका सिमा नाकाबाट ल्याउने क्रम पनि बढेको प्रहरीले जनाएको छ ।
गत असार २९ गते विमानस्थलबाट बाहिरिएको ६१ किलो सुन राजश्व अनुसन्धान विभागले बरामद गरेको थियो । त्यतिबेला ब्रेक सुमा रहेको सुन भन्सार जाँचपास गरेर सिनामंगल सडकमा पुगेको अवस्थामा बरामद गरिएको हो । त्यसअघि विद्युतीय चुरोट भेपमा लुकाएर ९ केजी सुन ल्याइएको पाइएको थियो । उक्त सुन तस्करीको आरोपमा पूर्वसभामुख कृष्णबहादुर महराको छोरा राहुल पुर्पक्षका लागि थुनामा छन् ।
गत भदौ ३ र असोज १३ गते केरुङ रसुवा नाकाबाट ल्याएको ३ केजी, असोज १० र ११ गते दोलखा राङजिया नाकाबाट सडकमार्ग हुँदै ल्याइएको ७ केजी सुन बरामद गरिएको थियो ।
पछिल्लो १० वर्षमा तस्करी गरेर ल्याइएको ७ सय किलो सुन बरामद भएको प्रहरी प्रधान कार्यालयको तथ्यांक छ । सुन ओसारपसारमा संलग्न ५ सय ९९ जना पक्राउ परेका छन् ।
