हामी जहिले पनि आफ्ना बालबच्चालाई सफलताका लागि प्रेरित गर्छौं । परीक्षामा धेरै अङ्क हासिल गरेको हेर्न चाहन्छौं । खेलकुदमा जितेर ट्रफी, मेडल ल्याएको हेर्न चाहन्छौं । पढाई, करियर कुनै पनि कुरामा ठेस नलागोस् । निरन्तर अगाडि बढिरहोस् भनेर कामना गर्छौं । त्यही अनुसार हामीले बालबच्चालाई सधंै अगाडि बढ्न र सफल हुनका लागि भनिरहेका हुन्छौं ।
प्रगति गर्नु, सफल हुनु पक्कै नराम्रो होइन तर जीवनमा सधैं र सबै कुरामा सफलता मात्र हासिल हुँदैन । धेरै कठिनाईसँग जुध्नुपर्ने हुन्छ । असहज परिस्थितिहरु झेल्नुपर्ने हुन्छ । असफलताको सामना गर्नुपर्ने हुन्छ । सफलताको उन्मादमा रमाइरहेकाहरुले जीवनमा आइपर्ने यस्ता समस्यालाई सहजै लिन सक्दैनन् । उनीहरु यसबाट नराम्ररी विचलित हुन्छन् । अब के गर्ने ? असहज स्थितिलाई कसरी सम्हाल्ने उनीहरुले भेउ पाउँदैनन् । आखिरमा उनीहरु खराब बाटो रोज्न तयार हुन्छन् ।
त्यसैले बालबच्चा हुर्काउने क्रममा उनीहरुलाई हार्न पनि सिकाउनुपर्छ । उनीहरुलाई सधैं सहज वातावरणमा मात्र रमाउन दिनु हुँदैन । असहज परिस्थितिहरुमा आफूलाई सम्हाल्न पनि सिकाउनुपर्छ । कतिपय कुरा आमाबुवाले जानीबुझी नै गर्नुपर्छ, जसबाट उनीहरुले जीवनोपयोगी पाठ सिक्न सक्छन् ।
