काठमाडौं । दुर्गा प्रसाईंको काठमाडौं केन्द्रित भेलाका लागि उपत्यका बाहिरबाट आएका महिलाहरुलाई एमाले कार्यकर्ताले मध्यराति होटलबाट लखेटेका छन्। काठमाडौंको एक होटलमा सुत्ने तरखरमा रहेका उनीहरुलाई प्रसाईंको भेलाका लागि आएको भन्दै लखेटिएको भिडियो सामाजिक सञ्जालमा सार्वजनिक भएको छ ।
प्रसाईका कार्यकर्ता भन्दै सुतिरहेका सर्वसाधारणलाई मध्यरातमा उठाएको दृश्य बिहीबार बिहानदेखि सामाजिक सञ्जालमा भाइरल बनेको छ। आफूलाई युवा संघका कार्यकर्ता भन्ने समूहले दुर्गा प्रसाईको आन्दोलनमा आएको हो भन्दै जबर्जस्ती उठाएर घर फर्काउने प्रयास गरेको भिडियोमा देखिन्छ। ‘जहाँबाट आएको हो उतै फर्कनुस्’ धम्कीपूर्ण शैलीमा भनिएको छ।
भिडियो सार्वजनिक भएसँगै सामाजिक सञ्जालमा एमालेको आलोचना सुरु भएको छ। कतिपयले यही घटनाका कारण आफूहरूले दुर्गा प्रसाईको कार्यक्रमलाई सहयोग गर्नेसमेत बताएका छन्। तर, युवा संघले भने उक्त काम आफूहरुको नभएको दावी गरेको छ। युवा संघका अध्यक्ष क्षितिज थेवेले आफ्ना साथीहरुले यस्तो अमानवीय हर्कत नगरेको बताए । हामी पनि यो घट्नामा छानबिन गरिरहेका छौं । घुसपैठ भएको हुनसक्ने आशंका भएका छन्।
हामी आफै सिरिसय भएर छानबिन गरिरहेका छौं । महिलामाथि यस्तो हर्कत युवा संघले गर्दैन। प्रहरीले पनि छानबिन गरिरहेको होला, यदि हाम्रा स्थानीय साथीहरुको संलग्नता भेटिए तुरुन्तै प्रहरीलाई बुझाउछौं,’ थेवेले भने ।
