नेपाल चिकित्सक संघको तेस्रो स्वास्थ्य शिखर सम्मेलन मंसिर १० र ११ गते हुने भएको छ । यसअघि अनिश्चितकालका लागि स्थगित गरिएको सम्मेलन आगामी आइतबार र सोमबार काठमाडौंको बबरमहलस्थित कार्की ब्याङ्क्वेटमा गर्ने गरी मिति तोकिएको हो ।
‘गुणस्तरीय स्वास्थ्य सेवाको प्रवर्द्धनः अवसर र चुनौती’ मूल नारासहित स्वास्थ्य सम्मेलन गरिने संघले जानकारी दिएको छ । संघका अनुसार ६ वटा विधामा छलफल तथा बहस हुनेछ ।
जसमा दोस्रो राष्ट्रिय स्वास्थ्य शिखर सम्मेलनका उपलब्धि, चिकित्सा विज्ञानको विकासका लागि खोज, अनुसन्धान तथा नवपरिवर्तन, स्वास्थ्य सेवा प्रणालीको उन्नयनका लागि स्वास्थ्य अर्थशास्त्र, सुरक्षित स्वास्थ्य सेवा प्रवाहको सबलिकरण, समान सेवाका लागि स्वास्थ्य प्रणाली, स्तरीय स्वास्थ्य सेवाका लागि गुणस्तरीय सेवा रहेका छन् ।
स्वास्थ्य तथा जनसंख्यामन्त्री मोहनबहादुर बस्नेतको प्रमुख आतिथ्यतामा हुने सम्मेलनमा विषयविज्ञ, प्रबुद्धवर्ग, नेतृत्व तथा सरोकारवालाहरुको प्रत्यक्ष सहभागिता रहने संघले जानकारी दिएको छ ।
गत असोज १२ र १३ गतेका लागि तय भएको सम्मेलन अन्तिम समयमा स्थगित भएको थियो ।
