स्वस्थ रहन अपनाउनै पर्ने सजिलो तरिका

स्वस्थ, फिट र आकर्षक देखिने चहना त सबैको हुन्छ तर पनि कतिपय बानी व्यवहारलाई नियन्त्रण गर्न नसक्दा पूरा हुन सकिरहेको हुँदैन अथवा केही न केही समस्या आई नै रहन्छ । त्यसैले यहाँ दैनिक रुपमा सजिलै प्रयोगमा ल्याउन सक्ने केही तरिकाहरु बताइएको छ जसले स्वस्थ र फिट रहन मद्दत गर्छ —

१. बिहान सबेरै उठ्नु स्वास्थ्यका लागि लाभदायक हुन्छ । विभिन्न अध्ययनहरुले पनि बिहान सबेरै उठ्नेमा रोगहरु पनि कम लाग्ने बताएका छन् ।
२. स्वस्थ रहनका लागि जंक र प्रोसेस्ड खाना खानु हुँदैन । जंक र प्रोसेस्ड खानामा केवल फ्याट मात्रै होइन नुनको मात्रा पनि बढी हुन्छ । यसका साथै मोटोपना बढाउने अन्य धेरै रसायनहरु पनि अत्याधिक मात्रामा हुन्छ ।
३. खाना खाँदा पानी पिउनु राम्रो होइन । खाना खानु भन्दा आधाघन्टा अगाडि र खाईसकेपछि आधा घन्टापछि मात्रै पानी पिउनु उत्तम मानिन्छ । दैनिक कम्तिमा सात आठ गिलास पानी पिउनु पर्छ ।
४. राति सुत्नु भन्दा कम्तिमा पनि दुई तीन घन्टा अगाडि खाना खाइसक्नुपर्छ । खाना खाईसकेपछि केही समय सामान्य हिँडडुल तथा केही काम गर्नुपर्छ जसले गर्दा खाएको खाना सजिलै पच्छ ।
५. प्राकृतिक रुपमा पाइने सबै प्रकारका खाना, सब्जी, फलफूल, दाल, गेडागुडी, माछामासु आदिलाई मिलाएर आफ्नो खानालाई कलरफूल बनाउनुपर्छ ।
६. कडा शारीरिक ब्यायाम नगरे पनि पनि बिहान बेलुका केही समय सामान्य हिँडडुल, योगा अथवा ध्यानमा लगाउनाले शरीर स्वस्थ, स्फूर्त र फिट रहने निश्चित छ ।