काठमाडौं । प्रतिनिधि सभा र प्रदेश सभा निर्वाचन आउन ११ दिन बाँकी रहँदा निर्वाचन आयोगले आचारसंहिता कार्यान्वयन नगर्नेहरूमाथि निगरानी बढाएको छ ।
आयोगले अहिलेसम्म ८८ जनालाई स्पष्टिकरण सोधेको छ । बिहिबार मात्रै नेपाल चलचित्र वोर्डका अध्यक्ष भुवन केसीलाई स्पष्टिकरण सोधेको आयोगले अहिलेसम्म एकजनालाई मात्रै कारबाही गरेको हो ।
आचारसंहिता उल्लघंनकर्तामाथि स्पष्टीकरण सोध्न आक्रामक देखिएको आयोग उल्लघंनकर्तामाथि कारबाही गर्न भने अग्रसर देखिएको छैन ।
आयोगले नेकपा माओवादी केन्द्रका अध्यक्ष प्रचण्डलाई मात्रै दुईपटक स्पष्टिकरण सोधेको छ । कांग्रेस महामन्त्री गगन थापा र अर्का महामन्त्री विश्वप्रकाश शर्मालाई समेत आयोगले स्पष्टिकरण सोधिसकेको छ ।
आयोगले नेकपा एकीकृत समाजवादीका अध्यक्ष माधवकुमार नेपालमाथि छानविन गर्न जिल्ला प्रहरी कार्यालय रौतहटलाई निर्देशन समेत दिएको थियो । तर, आयोगले काठमाडौं महानगरपालिका–१६ का वडाध्यक्ष मुकुन्द रिजाललाई मात्रै आचारसंहिता उल्लंघन गरेको भन्दै कारबाही गरेको छ । उनलाई आयोगले ५ हजार जरिवाना तोकेको छ ।
