काठमाडौँ- सशस्त्र प्रहरी बलले झापाको पूर्वी नाकाको मेचीपुल सीमा ईलाकामा तालिम प्राप्त कुकुरसहित प्रहरी टोली परिचालन गरेको छ । सशस्त्र प्रहरी निरीक्षक दिल कुमार श्रेष्ठले जारी गरेको सूचनामा चाडपर्वको बेला सीमा क्षेत्रमा हुने अवैध हातहतियार, विष्फोटक पदार्थ र लागूऔषध पहिचान गर्नसक्ने दुई वटा तालिमप्राप्त कुकुर परिचालन गरिएको हो ।
सशस्त्र प्रहरी प्रधान कार्यालय पशु तथा डग हेण्डलर उप–उपशाखाबाट परिचालित जुलेट ल्याब्रोडोरले हातहतियार तथा विष्फोटक पदार्थ र जोजो ल्याब्रोडोरले लागूऔषध पहिचान गर्नेछ । सशस्त्र प्रहरी बल नेपाल प्रधान कार्यालय पशु तथा डग हैण्डलर उप–उपशाखाबाट परिचालित जुलेट ल्याब्रोडोरले हातहतियार तथा विष्फोटक पदार्थ र जोजो ल्याब्रोडोरले लागूऔषध पहिचान गर्नेछ ।
विश्व परिवेशमा हातहतियार, विष्फोटक पदार्थलगायत लागूऔषध पहिचानमा कुकुर परिचालन अति प्रभावकारी रहिआएको सशस्त्रले जनाएको छ । सुरक्षाकर्मीको नाङ्गो आँखाले देख्न तथा छुट्याउन नसक्ने यस्तो प्रकृतीको गैरकानुनी क्रियाकलाप रोक्नका लागि अन्य सीमा नाकाहरुमा पनि तालिम प्राप्त जनशक्ति तथा कुकुरको तैनाथी बढाउँदै लैजाने संगठनको योजना रहेको सूचनामा उल्लेख छ ।
यसअघि २०७२ सालको गोरखा भूकम्पको भग्नावशेषमा परी हराएका व्यक्तिहरुको पहिचान तथा उद्धार गर्नका साथै अन्य खोज तथा उद्धारमा तालिम प्राप्त कुकुर परिचालन गरिएको थियो । संसारका सुविधा सम्पन्न विमानस्थलमाहरुमा पनि हातहतियार, विष्फोटक पदार्थ र लागूऔषधको पहिचानमा यस्ता कुकुरको परिचालन गर्ने गरिन्छ ।
