मानव तस्करीको दक्षिण अमेरिकी बाटो हुँदै अमेरिका पुग्ने नेपालीको संख्या बढेपनि शरण पाउनेहरूको संख्या भने घटेको तथ्याङ्क सार्वजनिक भएको छ । अमेरिकी सरकारको पछिल्लो तथ्याङ्कअनुसार सन् २०२२ मा पाँच सय तीन नेपालीले मात्र अमेरिकामा शरण पाएका छन् । अमेरिकामा शरण पाउँन असाइलम स्वीकृत हुनुपर्छ ।
असाइलम अमेरिकी सरकारको डिपार्टमेन्ट अफ होमल्याण्ड सेक्युरिटी अन्तर्गत युएससीआईएसले सिधै र अमेरिकी अदालतले अदालती प्रक्रियाबाट दिन्छ । सन् २०२२ मा युएससीआईएसबाट सिधै एसाइलम स्वीकृत हुने नेपालीको संख्या १३ जनामात्रै रहेको छ । बितेको २४ वर्षमा अमेरिकामा सिधै शरण पाउँने नेपालीको यो नै सबैभन्दा कम संख्या हो । अहिले अमेरिकामा शरण माग्ने नेपालीको संख्या हजारौं छ । उनीहरूको एसाइलम मुद्दा अदालतमा चलिरहेको छ ।
जानकारहरुका अनुसार अझै पनि नेपालमा माओवादी सशस्त्र द्वन्दकै कारण देखाएर शरण माग्ने गरिएकाले यो संख्या घटेको हो । नेपालीले पुरानै कथा दोहो¥याएर शरण मागेपनि नेपालको वर्तमान अवस्थाका बारेमा अमेरिकी सरकार जानकार छ । नेपालमा जननिर्वाचित भएर पुष्षकमल दाहाल प्रचण्ड प्रधानमन्त्री भइरहेको अवस्थामा उनकै आतंकका कारण नेपालमा बाँच्न सकिएन भन्दै शरण माग्नु सिधैं ढाँट्नु हो भन्ने अमेरिकालाई थाहा नहुने कुरै भएन ।
त्यसमा पनि अहिले नेपालमा उनी नेपाली कांग्रेसकै गठबन्धनबाट प्रधानमन्त्री छन् उता अमेरिकामा भने आफूलाई कांग्रेसी कार्यकर्ता भएकाले माओवादीले बाँच्न नदिएको भन्दै शरण मागिँदैछ । यद्यपी अदालती प्रक्रियाबाट भने अझै पनि नेपालीहरूले उल्लेख्य संख्यामै अमेरिकामा शरण पाइरहेका छन् ।
