काठमाडौँ । दक्षिण चीन सागरमा चीन र फिलिपिन्स फेरि आमनेसामने भएका छन् । यस पटक यो विषय फ्लोटिंग ब्यारियरसँग सम्बन्धित छ । सेप्टेम्बर २६ मा, फिलिपिन्स कोस्ट गार्डले दक्षिण चीन सागरको स्कारबोरो शोल क्षेत्रमा चीनले लगाएको फ्लोटिंग ब्यारियर हटाएपछि चीनले फिलिपिन्सलाई जानाजानी समस्या सिर्जना नगर्न चेतावनी दिएको छ ।
चिनियाँ परराष्ट्र मन्त्रालयका प्रवक्ता वाङ वेनबिनले भने( चीनको सार्वभौमसत्ता, सामुद्रिक अधिकार र ह्वाङयान दाओ ९स्कारबोरो शोलको चिनियाँ नाम० मा हितको रक्षा गर्ने दृढ संकल्प अटल छ । हामी फिलिपिन्सलाई उत्तेजक कार्यहरू नगर्न वा समस्या सिर्जना नगर्न अपील गर्दछौं। टापु र यसको वरपरको क्षेत्र चीनको हो ।’
चीनको चेतावनीमा फिलिपिन्सका राष्ट्रिय सुरक्षा सल्लाहकार एडुआर्डो आनोले तैरिरहेको अवरोध हटाउने काम फिलिपिन्सको अधिकार क्षेत्रभित्र पर्ने बताएका छन् । सन् १९८२ मा समुद्रको कानूनसम्बन्धी संयुक्त राष्ट्र संघको महासन्धि अनुसार सबै देशलाई करिब २०० समुद्री तट विस्तार गर्ने अधिकार छ ।
स्कारबोरो शोल क्षेत्र फिलिपिन्सको मुख्य टापु लुजोनबाट २४० किलोमिटर पश्चिममा अवस्थित छ । जबकि यसको दूरी चीनको मुख्य प्रान्त हाइनानबाट करिब ९०० किलोमिटर रहेको छ ।
बेइजिङले दक्षिण चीन सागरमा फिलिपिन्सको माछा मार्ने जहाजलाई रोक्न स्कार्बोरो शोल क्षेत्रमा तैरिरहेको अवरोधहरू स्थापना गरेको थियो । साउथ चाइना मर्निङ पोस्टको रिपोर्टका अनुसार चीनले फिलिपिन्सबाट करिब २०० किलोमिटर टाढा रहेको स्कारबोरो शोलमा लगुनको प्रवेशद्वारमा ३०० मिटर लामो ब्यारियर जडान गरेको थियो। फिलिपिन्सले यो अवरोध तोडेको छ ।
चीन र फिलिपिन्सबीच सन् २०१२ देखि स्कारबोरो शोललाई लिएर विवाद छ । दुवैले दाबी गरे पनि हाल यो बेइजिङको नियन्त्रणमा छ ।
दक्षिण चीन सागरमा फिलिपिन्स र चीनबीच यसअघि पनि यस प्रकारको द्वन्द्व धेरै पटक भइसकेको छ ।
