पोखरा , २२ कात्तिक । प्रतिनिधि सभा तथा प्रदेश सभा सदस्यको निर्वाचन नजिकिँदै गर्दा राष्ट्रिय स्वतन्त्र पार्टीको चुनावी घरदैलो अभियानलाई तीव्र पारेको छ ।
उम्मेदवार तथा पार्टीका कार्यकर्ताले कास्की निर्वाचन क्षेत्र नं १ अन्तरगत मादी गाँउपालिकाको ताङतिङ लगायत विभिन्न वडामा पुगेर मंगलबार चुनावी प्रचारप्रसार र घरदैलो अभियान तीव्र पारेका हुन् । उम्मेदवार तथा कार्यकर्ताले मतदातासँग भेट गरी भोट मागिरहेको जानकारी उक्त पार्टीका नेता शिव नेपालीले दिए ।
रबि लामिछाने अध्यक्ष रहेको राष्ट्रिय स्वतन्त्र पार्टीको कास्की क्षेत्र नं १ बाट प्रतिनिधि सभा सदस्य तर्फका प्रत्यक्ष उमेदवार राजु राईको टोली मतदातासँग भोट माग्न मादी गाउँपालिकाको ताङतिङ पुगेको हो । भ्रष्टाचार न्यूनीकरण, समृद्धि र विकासका लागि नयाँ पार्टीलाई भोट दिनुपर्ने भन्दै उनीहरुले मतदातासँग भोट मागिरहेका छन् ।
ताङतिङ पुग्नुभएका उमेदवार राई र उहाँको टोलीले त्यहाँ पुग्दा मतदाताहरु उत्साहित भएको जानकारी नेता नेपालीले दिनुभयो । उक्त टोली मत माग्न मादी गाउँपालिकाका सबै वडामा पुग्ने बताइएको छ ।
