काठमाडौं – स्कुल बसको झ्यालबाट टाउको निकाल्दा रुखमा ठोक्किएर बेस्ट इलिमेन्टरी मन्टेश्वरी स्कुलका १३ वर्षीय आयुष्मान दाहालको मृत्यु भएको छ । काठमाडौंको लाजिम्पाटमा बसको झ्यालबाट टाउको निकाल्दा रूखमा ठोक्किएर घाइते भएको दाहालको उपचारको क्रममा टिचिङ अस्पतालमा मृत्यु भएको हो ।
बुधबार दिउँसो साढे ३ बजे बा १ क ४६४२ नम्बरको बसको झ्यालबाट टाउको निकाल्दा रूखमा ठोक्किएर घाइते भएका उनलाई उपचारको लािग टिचिङ अस्पताल लगिएको थियो । प्रहरीका अनुसार घटना स्कुल बाहिर भएको थियो। गाडी विद्यालयबाट निस्किने बेलामा दुर्घटना भएको थियो। दाहाल बसको पछाडिको सिटमा बसेका थिए।
दाहाल ५ कक्षामा अध्ययरत थिए। उनीको उपचारको क्रममा आज बिहान सवा २ बजे मृत्यु भएको प्रहरीले जनाएको छ । पोष्टमार्टमको लागि दाहालको शव टिचिङ अस्पतालमा राखिएको छ। प्रहरीले बस चालक रोशन अधिकारीलाई नियन्त्रणमा लिएको छ।
