इस्लामाबाद – पाकिस्तानको बलुचिस्तानमा भीषण आतंकवादी आक्रमणमा १३ जनाको मृत्यु भएको छ। आक्रमणकारीले चिनियाँ कम्पनीको गाडीलाई निशाना बनाएका थिए।
उक्त आक्रमण ग्वादरमा भएको थियो। चीन(पाकिस्ताान इकोनोमिक करिडोर (सीपीईसी) का कैयौँ परियोजनामा काम भइरहेको छ। आक्रमणमा चिनियाँ नागरिक मारिएका छन्। आक्रमणको जिम्मा बलुच लिबरेशन आर्मी (बीएलए) को आत्मघाती दस्ता माजिद ब्रिगेडले लिएको छ।
बीएलएले ग्वादर आक्रमणमा १३ जनाको मृत्यु भएको बताएको। मारिनेमध्ये चार चिनियाँ र ९ पाकिस्तानी सैनिक रहेका छन्। यसैगरी आफ्ना दुई लडाकु बेपत्ता भएको उसले बताएको छ।
ग्वादरमा लामो समयसम्म विस्फोट र गोलाबारीको आवाज सुनिएको स्थानीयले बताएका छन्। सडक पूरै बन्द गरिएको थियो। चिनियाँ इन्जिनियरको गाडीमा बिहान करिब साढे ९ बजे आक्रमण भएको थियो। दुई घण्टा बितिसक्दा पनि स्थिति निकै तनावपूर्ण देखिन्थ्यो।
बीएलएले बलुचिस्तानमा चिनियाँ लगानीको विरोध गर्दै आएको छ। चिनियाँ लगानीबाट बलुचिस्तानका बासिन्दालाई कुनै लाभ नहुने बताउँदै आएको छ।
आक्रमणपछि पाकिस्तानस्थित चिनियाँ वाणिज्य दूतावासले बलुचिस्तान र सिन्धमा रहेका आफ्ना नागरिकहरूलाई अर्को आदेश नभएसम्म घरभित्रै बस्न आदेश दिएको छ।
पाकिस्तानी सुरक्षा बलले दुई आक्रमणकारीको तस्बिर जारी गरेको छ। अस्पताल र स्थानीय स्रोतहरूले पनि आक्रमणमा धेरै व्यक्तिको मृत्यु भएको पुष्टि गरेका छन्।
चीनले सीपीईसी परियोजनाहरूमा पाकिस्तानमा ४८ अर्ब डलरभन्दा बढी लगानी गरेको छ। यो वर्ष चीन र पाकिस्तानी सेनाबीच वार्ता भएको थियो।
चीनले पाकिस्तानले चिनियाँ नागरिक र बलुचिस्तानमा हुने आक्रमण रोक्न असफल भए राम्रो नहुने चेतावनी दिएको थियो। चीन भ्रमणमा रहेका वेला पाकिस्तानी गुप्तचर संस्था (आईएसआई) का प्रमुख लेफ्टिनेन्ट जनरल नदीम अन्जुमलाई चीनले उक्त चेतावनी दिएको थियो। सेना प्रमुख जनरल असीम मुनिरको चीन भ्रमणका क्रममा पनि यो कुरा औंल्याइएको थियो।
चीन सीपीईसी र यसमा सहभागी चिनियाँ नागरिकको सुरक्षाका विषयमा निकै चिन्तित रहेको हालै साउथ चाइना मर्निङ पोष्टमा उल्लेख गरिएको थियो।
