कैलालीमा जेलरले रूपैयाँ लिएर कैदीलाई भगाएका छन्। कैलाली कारागारका प्रमुख पदमराज तिमिल्सेनाले रूपैयाँ लिएर कैदीलाई भगाएको रहस्य खुलेको हो।
तिमिल्सेनाले लागूऔषध मुद्दामा कैद भुक्तान गरिरहेका गौरिगंगा नगरपालिका ९ का ईश्वर पौडेलबाट मोटो रकम लिएर भगाएको कारागार स्रोतले बतायो। पछिल्लो समय जेलर तिमिल्सेना प्रति कैदीबन्दीनै असन्तुष्ट रहेका छन्।
तिमिल्सेनाले मोटो रकम दिए जेलबाट भगाइदिने भन्दैु कैदीलाई भगाएको नाम नबताउने सर्तमा एक कैदीले बताए।
३४ ग्राम लागूऔषध खैरो हिरोइनसहित पारस बम, राम सिराडी र ईश्वर पौडेल चार महिना अगाडि पक्राउ परेका थिए। पक्राउ परेकामध्ये जेलर तिमिल्सेनाले पौडेलबाट रूपैयाँ लिएर भगाएका हुन्।
यस विषयमा जेलर तिमिल्सेनालाई बुझ्दा उनले कैदी पौडेललाई छोडेको स्वीकार गरेका छन्। उनले आफूले रूपैयाँ नलिएको जिकिर गरे।
उनले ईश्वर पौडेल १५ ग्राम लागूऔषध खैरो हिरोइनसहित पक्राउ परेको मुद्दामा सफाई पाएको आधारमा छोडेको बताए।
उनले ३४ ग्राम खैरो हिरोइनसहित पक्राउ परेको मुद्दामा भने सफाई नपाएको पनि स्वीकार गरे। उनले पौडेलको एक सातादेखि खोजी भइरहेको बताएका छन्।
जेलर तिमिल्सेना कारागार कैलाली आएदेखि कारागारको मर्यादा विपरीत कार्य गर्दै आएका छन्।
उनले आफू कैलालीमा कमाउन आएको भन्दै कारागारभित्र लागूऔषध, मदिरा भित्र्याउने र कैदीबाट मोटो रकम लिएर भगाउने काम गरेको बताइएको छ।
