काठमाडौं । वेलायतको प्रधानमन्त्रीमा ऋषि सुनक नियुक्त भएका छन् । सत्तारुढ कन्जरभेटिभ पार्टीको सांसद निर्वाचित भएको सात वर्षमै बेलायतको प्रधानमन्त्री नियुक्त भएका सुनकलाई राजा चाल्सले प्रधानमन्त्री नियुक्त गरेका हुन् ।
सुनकका बाबुआमा दुवै पूर्वी अफ्रिकाबाट बेलायत आएका हुन् र दुवै भारतीय मूलका हुन् । डाक्टर बुवा र औषधि पसल सञ्चालन गर्ने आमाका सन्तानका रूपमा उनी सन् १९८० मा बेलायतको साउथह्याम्पटनमा जन्मिएका हुन् । सुनकले विन्चेस्टर कलेज र अक्सफोर्ड विश्वविद्यालयमा दर्शन, राजनीति शास्त्र र अर्थशास्त्र पढेका थिए ।
अमेरिकास्थित स्ट्यान्डफर्ड युनिभर्सिटीबाट एमबीए पास गरेका उनका दुई छोरी छन् । वेलायतका धनी सांसदहरुमध्ये एक रहेका सुनकले सन् २००१ देखि २००४ सम्म गोल्डम्यान स्याक्स बैंकमा विश्लेषकका रुपमा काम गरेका थिए ।
क्रिश्चियन बाहुल्य रहेको बेलायतमा सुनक पहिलो हिन्दु धर्मावलम्बी प्रधानमन्त्री नियुक्त भएका हुन् । बेलायतको प्रधानमन्त्री बन्ने पहिलो गैर–श्वेत व्यक्ति पनि सुनक बनेका छन् ।
