काठमाडौं – वैदेशिक अध्ययनमा जान परामर्शदाताको भूमिका निर्वाह गर्न खोलिएका कन्सल्टेन्सीहरुले कानुन विपरित रोजगारीमा पठाउन लागेका छन् । विद्यार्थीलाई काममा पठाउन नमिल्ने प्रावधान भएपनि पैसाको लोभमा कन्सल्टेन्सीहरुले विद्यार्थीलाई श्रमिकका रुपमा पठाउने अवैध धन्दामा लागेका हुन ।
पछिल्लो सयम युवा पुस्तामा वैदेशिक अध्ययनमा आकर्षण बढ्दै गएको छ । कक्षा १२ सकेर वैदेशिक अध्ययनमा जाने लर्को लामै हुन थालेको छ । अहिले युवामाझ बैदेशिक अध्यययन निर्विकल्प भएको छ ।
४ वर्षे स्नातक तह पढ्न झन्झट मान्दै विदेश अध्ययनमा विद्यार्थीको आकर्षण बढेका बेला कन्सल्टेन्सीहरुले यसको गलत फाईदा उठाउन थालेका छन् । वेदेशिक अध्ययनका लागि विद्यार्थीको संङ्ख्या बढेसँगै विद्यार्थीहरुलाई विदेश लैजान सहजकर्ताको भूमिका निर्वाह गर्ने कन्सल्टेन्सीहरु गैरकानुनी रुपमा श्रमिक पठाउने धन्दामा लागेको पाईएको हो ।
राम्रो रोजगार, कमाई र ठूलो देशको सपना देखाएर विद्यार्थीहरुलाई वर्कीङ भिसामा विदेश पठाएर उनीहरुलाई ठग्ने काममा कन्सटेन्सीहरु सक्रिय भएका हुन् । टोफेल, आईएलटिएस, पिटिई, सिम्याट लगायतका कोर्ष पढाएर विद्यार्थीलाई सहजीकरण गर्न खोलीएको कन्सल्टेन्सीले सोझै पैसा मागेर विद्यार्थी पठाउन थालेका हुन । जबकी नियम अनुसार कन्सल्टेन्सीले विद्यार्थीलाई विदेश पठाउने काममा मात्र सहायता गर्न पाउँछन् ।
वैदेशिक रोजगार विभागबाट ईजाजत प्राप्त म्यानपावर कम्पनीले मात्र वैदेशिक रोजगारीमा पठाउन पाउने कानुनी प्रावधान छ । कन्सल्टेन्सीहरुले भने अमेरिका, जर्मनी, बेलायत र जापानमा काम लगाईदिन्छु भन्दै प्रतिव्यक्ति ३० देखी ५० लाख सम्म विद्यार्थीको पैसा ठगेको पाईएको छ । कम्बोडिया, अष्ट्रेलिया लगायत यूरोपियन मुलुकमा आकर्षक तलबको लोभ देखाएर कन्सल्टेन्सी र ट्राभल एजेन्सीहरुले विद्यार्थी ठगेका घटना सार्वजनिक भएको छ । वैदेशिक रोजगार विभागका अनुसार १ हजार २३ जनालाई १६ करोड रुपैयाँ बढी ठगिएको तथ्याङ्क छ ।
नेपाल शैक्षिक परामर्श संघ (ईक्यान)का अनुसार देशैभर ५ हजार कन्सल्टेन्सीहरु सञ्चालित छन् । त्यसमध्ये १ हजार ४ सय ७३ ले मात्रै शिक्षा मन्त्रालयबाट स्विकृती लिएका छन् । स्वीकृत नलिएका बाँकी सबै कन्सल्टेन्सीहरु गैरकानुनी रुपमा सञ्चालन भएका हुन् । होडिङ बोर्ड राखेकै भरमा सञ्चालन भएका यस्ता कन्सल्टेन्सीले नै विद्यार्थी ठग्न सक्रिए भएको ईक्यानको दावी छ ।
अहिलो दैनिक सरदर ५ सय विद्यार्थी अनुमतिका लागि वैदेशिक अध्ययन अनुमतिपत्र शाखामा धाउने गरेका छन् । यस वर्ष ७१ मुलुकमा अध्ययनका लागि १ लाख ५ हजार ९२ विद्यार्थीले अनुमति लिइसकेका छन् । यो संख्या अघिल्लो वर्षको तुलनामा २५ सयले बढी हो । यो समयमा विद्यार्थीहरुको आकर्षण छिटो विदेश पठाउने कन्सल्टेन्सीमा नै गएको छ । यसको फाइदा उठाउँदै कन्सल्टेन्सीहरुलाई विद्यार्थी ठग्न सक्रिय भएका छन् ।
