काठमाडौँ । स्पेनिस प्रशिक्षक लुइस इनरिक फ्रेन्च क्लब पिएसजीको प्रशिक्षक बनेका छन् । ५३ बर्षिय इनरिकले पिएसजीमा दुई बर्षको सम्झौता गरेका हुन् ।
गत विश्वकपपछि स्पेनको राष्ट्रिय प्रशिक्षकको जिम्मेवारी छोडेपछि अहिलेसम्म कुनै जिम्मेवारीमा रहेका थिएनन् ।
अब इनरिकले पिएसजीमा प्रशिक्षक क्रिस्टोफर गाल्टिएरको ठाउँ लिएका छन् ।
यसअघि पिएसजीले यसअघि बायर्न म्युनिखका पूर्व प्रशिक्षक जुलियन नागेल्सम्यानसँग गरेको छलफल निष्कर्षमा पुग्न नसकेपछि इनरिकलाई प्रशिक्षक बनाएको हो ।
अब पिएसजीमा इनरिकले किलीयन एम्बाप्पे र नेइमार जस्ता खेलाडीले क्लब छोड्ने सक्ने चुनौतीको सामना गर्नुपर्ने भएको छ ।
२०१४ देखि २०१७ सम्म बार्सिलोनाको प्रशिक्षक रहेका इनरिकले बार्सिलोनालाई एक च्याम्पियन्स लिग र दुई सिजन ला लिगाको उपाधि दिलाएका थिए । उनी विश्व फुटबलको प्रशिक्षकमा सफल प्रशिक्षक मध्ये एक मानिन्छन् । तर स्पेनिस टिमको प्रशिक्षकको रुपमा भने उनी त्यति सफल हुन सकेनन ।
गत डिसेम्बरमा सम्पन्न विश्वकपमा स्पेन राउण्ड १६ मा मोरक्कोसँग पेनाल्टी सुटआउटमा पराजित भएर बाहिरिएको थियो ।
