काठमाडौं । काठमाडौं महानगरपालिकाका प्रमुख बालेन्द्र साह बालेनले अदालतले हिन्दी फिल्म प्रदर्शनमा रोक नलगाउन दिएको आदेश नमान्ने चेतावनी दिएका छन् ।
उच्च अदालत पाटनले बिहीबार कुनै पनि हिन्दी फिल्म नरोक्न अन्तरिम आदेश जारी गरेलगत्तै बालेनले सामाजिक सञ्जालमार्फत आफू जुनसुकै सजाय भोग्न तयार रहेको, तर हिन्दी फिल्म चल्न नदिने घोषणा गरेका हुन् ।
बालेनले लेखेका छन्, ‘जहाँ सवाल देशको सार्वभौमिकता र स्वाधीनताको आउँछ, म कुनै कानुन र अदालतलाई मान्नेवाला छैन । फिल्म लेखकले नेपाल भारतको अधिनमा थियो भनिसकेपछि उनीहरुको नियत थाहा हुन्छ ।
यो कुरालाई नेपाल सरकारले स्टन्ट भन्नु र अदालतले फिल्म चल्न दिनु भनेको नेपाल भारतको अधीनमा थियो, अदालत र सरकार भारतको गुलाम भएको बुझिन्छ । यसका लागि जुनसुकै सजाय भोग्न तयार छु, तर फिल्म चल्दैन र चल्न दिइनेछैन ।’
बालेनको यो चुनौतीसँगै अब उनको अदालतसँग सिधा टक्कर चल्ने भएको छ । यदि अदालतको आदेश अवहेलना भएमा उनीमाथि अवहेलना मुद्दा पनि लाग्न सक्छ । यसअघि शैक्षिक मेला गर्न बालेनले रोक लगाएकोमा उच्च अदालतले मेला नरोक्न आदेश दिइसकेको छ।
