बेइजिङ । चिनियाँ रक्षामन्त्री ली शाङ्फूले पारस्परिक तनावका विषयमा अमेरिकासँग संवाद गर्न बेइजिङ इच्छुक रहेको बताएका छन् ।
सिंगापुरमा जारी एसियाको उच्चस्तरीय रक्षा सम्मेलन(द सांग्रिला डायलगलाई सम्बोधन गर्दै चिनियाँ रक्षामन्त्री लीले चीन र अमेरिकाबीच हुने कुनै पनि द्वन्द्वले विश्वमा ठूलो विपत्ति निम्त्याउने चेतावनी दिएका छन् ।
गत मार्चमा रक्षामन्त्री नियुक्त भएयता अन्तर्राष्ट्रिय मञ्चमा गरेको लीको यो पहिलो सम्बोधन हो । चीन र अमेरिकाको आ(आफ्नै पद्धति रहेको र दुवै देश विभिन्न दृष्टिले फरक रहे पनि यसले दुवै देशलाई साझा धरातल र साझा चासोका विषय खोज्न तथा पारस्परिक सम्बन्ध र सहयोगलाई बलियो बनाउनबाट रोक्न नहुने उनको धारणा छ ।
उदाउँदो विश्वशक्ति चीन र विश्वशक्ति राष्ट्र अमेरिकाबीच आर्थिक तथा वैश्विक प्रभाव विस्तारका क्षेत्रमा प्रतिस्पर्धा छ । ताइवान मामिला, साउथ चाइना सीको जलक्षेत्रमाथिको विवाद र चीनलाई सेमिकन्डकर चिप्स निर्यात गर्नमा राष्ट्रपति जो बाइडनले लगाएको रोक लगायतका विषयलाई लिएर पछिल्ला दिनमा दुई देशबीच तनाव बढेर गएको छ ।
हिजो मात्रै यही सम्मेलनलाई सम्बोधन गर्दै अमेरिकी रक्षामन्त्री लोयड अस्टिनले सैन्य वार्ता गर्न अस्वीकार गरेको भन्दै चीनको आलोचना गरेका थिए । अमेरिकाले रुसबाट हतियार खरिद गरेको भन्दै सन् २००८ मा यिनै लीमाथि प्रतिबन्ध लगाएको थियो । शुक्रवार आयोजित डिनरमा अस्टिन र लीले आपसमा हात मिलाए पनि दुवैबीच गहन छलफल भने हुन सकेको छैन ।
द सांग्रिला डायलग सन् २००२देखि प्रत्येक वर्ष सिंगापुरमा आयोजना हुँदै आएको छ ।
