काठमाडौं । नेकपा एमालेका अध्यक्ष केपी शर्मा ओलीले एमालेले सरकार छाडेको दुई बर्ष नपुग्दै मुलुकको अर्थतन्त्र तहसनहस भएको जिकिर गरेका छन् ।
अन्तराष्ट्रिय श्रमिक दिवसका अवसरमा नेपाल ट्रेड युनियन महासंघ जिफन्टले सोमबार काठमाडौंमा आयोजना गरेको कार्यक्रममा उनले सार्वजनिक सम्पतीका रुपमा मुलुकका ठूला उद्योगहरुर्लाइ निजिकरणका नाममा कौडीका नाममा बेचेर देशलाई टाट पल्टाउने काम हिजो भएको र आज पनि हुन खोजेकाले यसलाई रोक्नुपर्ने बताए ।
ओलीले औपचारिक तथा अनौपचारिक क्षेत्रमा योगदानका आधारमा पेन्सन कार्यक्रमको सुरुवात गरेको भन्दै विदेशमा रोजगारी गर्ने नेपालीहरुलाई योगदानका आधारमा पेन्सन कार्यक्रमको सुरुवात गर्नुपर्ने धारणा राखे ।
उनले अहिलेको सरकार सरकारमा किन बसिरहेको छ भन्ने नै प्रष्ट हुन नसकेको धारणा राखे । ओलीले सिंहदरबारको फोहर उठाउने काम महानगरको नभएको भन्दै सरकारले फोहरमाथि राजनीति गर्न खोजेको आरोप लगाए ।
यस्तै, ओलीले लोकतन्त्रका विरुद्ध अनेक प्रकारका तत्वहरु सक्रिय हुन थालेको बताए । अनेक प्रकारका तत्वहरु लोकतन्त्रलाई मास्न अनुकुल अवस्था आयो कि आएन भनेर चिहाउन थालेको भन्दै नेपाली जनता सजक हुनुपर्ने उनको भनाई छ ।
