हाम्रो पेट र आन्द्राले जति बढी रेसादार खानेकुरा पाउँछ, त्यति सजिलो पाचन कार्य गर्न सक्षम हुन्छ । मांसाहार रेसाहीन खाद्य हो । मनुष्यको शारीरिक बनावट मांसाहार अनुकूल हुँदै होइन । यस मान्यता विपरित यदि कोही मांसाहार सेवन गर्छ भने पेटभित्र पुगेको मांश आन्द्रामा गएर सड्न कुहिन थाल्दछ, जसबाट करोडौँ सङ्ख्यामा प्याथोजेनिक कीटाणुहरु उत्पन्न हुन्छन् ।
ती कीटाणु क्रमशः रक्तसञ्चार प्रणालीमा प्रवेश गर्छन् र रगतलाई प्रदूषित गरी उपयोगी कोषिकाहरुलाई हानि पु¥याउँछन् । त्यसैले, मांसाहारी व्यक्तिको रगत सधैँ प्रदूषित हुन्छ । जसका कारण अर्श, हर्निया, अतिसार, एपेन्डिसाइटिस हुने तथा कतिपयमा गर्भाशय, डिम्बग्रन्थि, आमाशय, आन्द्राको क्यान्सरसमेत उत्पन्न हुन्छ ।
अक्सफोर्ड विश्वविद्यालयका क्यान्सर रिसर्च सेन्टरको इपिडिमियोलोजी युटिमा आबद्ध डाक्टर टिमकाई एवम् सहयोगीहरुले ६१,००० व्यक्तिमाथि १२ वर्षको लामो अवधिसम्म शोधकार्य गरे । उक्त महत्वपूर्ण शोधको नतिजाअनुसार जुन व्यक्ति शाकाहारी हो, उसलाई मांसाहारी तुलनामा रगतसम्बन्धी रोग ल्युकेमिया हुने आशङ्का ४५ प्रतिशत कम हुन्छ भने क्यान्सरको डर ५२ प्रतिशत कम हुन्छ ।
साभारः ‘खाने कसरी पिउने कसरी’ पुस्तकबाट
